#125 圓咕碌爸爸 （兒子，3歲）

「早排同仔仔去睇積木展覽，其中有遊戲區，需要排隊。但每個攤位都有兩條隊，一條人多，一條人少。行近再睇，少人嗰條，係fast pass隊。

點解可以排快隊？都係離不開滿幾多消費額，或者係乜乜會員。簡單嚟講，都係同錢有關。

我地先去攤位 A，排正常隊。排隊嘅時候，我習慣同仔仔講解排隊嘅規則同原因。

講講下有對父子走近，姑且叫佢地做攣毛父子先。佢地排嘅，係快隊。而快隊無人，佢地排第一。由於攤位A每次可俾3個家庭玩，所以職員就放咗對父子，同埋另外兩個排正常隊嘅家庭入去

我慶幸當時仔仔無為意攣毛父子入咗去，否則佢問起點解佢地唔使排隊，我未必識點答。

但話口未完，攣毛小朋友走咗出黎，攣毛爸爸隨後，佢地進出嘅時間，唔超過30秒。攤位內得返兩個家庭，但由於有限時關係，為咗每位小朋友可以玩足 5 分鐘，公平起見，所以職員無再叫人入去。

我望向正常隊第一位小朋友，原本可以入去玩嘅佢，因為攣毛小朋友嘅一時興致，就要讓出佢嘅位置並且多等5分鐘。

而當攣毛父子連玩都無玩就走咗之後，正常隊呢位小朋友所多等嘅5分鐘，似乎變得更加無意義。

事情並未完結。

玩完攤位A後，我地轉戰攤位B，又見到嗰對父子，但無太留意，直至夠鐘，職員示意我地離開。但仔仔並未盡興，話要繼續同鴨仔積木玩，於是太太建議佢重新去排隊玩多次。

攤位B每次俾4個家庭玩，我望一望條隊，好好彩得3個家庭排緊，仲有一個限額。　心諗：『好極！唔洗再排就可以馬上再玩。』但臨到我地入去前，職員就拉閘，我以為自己數錯，於是再數一次。

一、二、三、四。

場入面第四個家庭，竟然就係攣毛父子。佢地無離開，由上一節玩到下一節。原來fast pass唔只可以先入，仲可以遲出。

仔仔喺閘後乖乖排隊，佢望住啲小朋友玩嘅眼神只係充滿喜悅同期待。

但係我睇到嘅，係另一個世界。我再次慶幸仔仔無為意對父子嘅存在。又或者，其實只得我察覺到。

最後到我地再玩完要離開時，攣毛父子仍然可以繼續留低。

我個腦突然『叮』一下，其實現實唔係都一樣咩？貧富左右命途，有人一出世就有 fast pass；有人要好努力先可以轉去排快隊；但有更多人，一生都只可以排慢隊。世界唔公平，係無法改變嘅事實。

所以，我在意嘅並非張fast pass，而係手持fast pass嘅小朋友——當佢得到特別優待時，會唔會有人教導佢咁係因為佢比其他人幸運，所以應該要心存感激；當佢輕易就獲得所愛時，有無人提醒佢，其他人可能等咗呢個機會好耐，所以佢應該要好好珍惜，亦可以學下體貼別人的需要。小朋友會唔會覺得一切理所當然，自己嘅人生，本該如此？

我拖住仔仔嘅手，問佢：『好玩嗎？』

佢好滿足咁話：『好玩！』

我為佢呢刻純潔嘅世界而感恩，但同時亦為佢將來要面對嘅大世界而感慨。」

圖片由受訪者提供