上次同大家講完 餵母乳飲唔飲得咖啡 ？
今次有媽媽問：點先可以加強初生BB的免疫力！？
又係時候搵好鐘意睇研究嘅爸爸科豆 ，同POPA編輯一齊尋找答案。
編輯：「有媽媽問初生BB嘅免疫系統未發展好，遇到細菌係咪一定會打輸？」
科豆：「無錯，BB免疫力係會較低。不過，喺孕期最後3個月，BB會經胎盤得到媽媽身體入面嘅抗體，就算BB離開咗媽媽嘅身體，媽媽嘅抗體都仲保護緊佢哋㗎！」
編輯：「咁點解有媽媽嘅抗體保護，BB都會病？」
科豆：「咁大家要搞清楚，抗體只係一個統稱。每遇到一種細菌或病毒，我哋身體都會針對呢一種細菌或病毒，製造出特定嘅抗體群去打佢哋㗎。」
編輯：「🤨可唔可以講返廣東話？」
科豆：「咪好似鎖匙同門鎖咁，一條鎖匙唔可以開到幾道唔同嘅門㗎！
例如，如果媽媽曾經患上過水痘，她嘅身體就會有針對水痘的抗體，這些水痘抗體會傳咗畀嬰兒。但如果母親沒有患過水痘，嬰兒就唔會有呢種抗體保護。
而且，從媽媽肚子裏獲得的抗體，喺BB兩個月大開始會慢慢消失，最後BB都係要靠自己嘅免疫系統，去抵抗各種不同的細菌及病毒。」
最後，提提大家，母乳亦含有抗體，所以母乳餵養的嬰兒，將可以獲得更長時間的「媽媽免疫力」。記住記住記住，媽媽在BB出生後頭幾天產生的初乳，含有特別豐富的抗體啊！
POPA小知識 – 早產BB與抗體
早產嬰兒患上疾病的風險較高，除了因為他們的免疫系統未成熟、免疫細胞較難殺死病原體，也因為文中提到的原因——BB在母體約第7個月起，才會逐漸經胎盤得到媽媽血液中的抗體——早產嬰兒沒能吸收到足夠抗體，所以會特別脆弱，需要特別護理。
參考資料
- How long do babies carry their mother’s immunity? Retrieved from NHS.
- Melville, J. M., & Moss, T. J. (2013). The immune consequences of preterm birth. Frontiers in neuroscience, 7, 79. doi:10.3389/fnins.2013.00079
圖片來源：Unsplash
