「本地今日錄得X個個案……」——每當聽到新聞話有本地個案時，好多家長都嚇到個心離一離，唔止因為擔心疫情，仲怕聽到呢兩隻字：停課。皆因再次停課的話，媽媽情緒極受影響，重投正常生活呢個夢想越想越悲觀。
各位，You are not alone～等我哋同大家分享英國5月尾一個重要研究。
艾塞克斯大學、薩里大學同伯明罕大學組成嘅研究團隊，審視咗當地1,500個家長嘅數據，佢哋嘅小朋友介乎4至12歲。團隊發現，學校自2020年3月開始停課後，嚴重危害咗父母嘅心理健康。
除咗比較疫情前後嘅分別，佢哋仲比較咗早復課同遲復課嘅分別。比起早於6月已優先復課，仔女要過埋暑假先可以返學嘅媽媽，心理健康受到更嚴重嘅影響——佢哋長期感到壓力、失眠多咗、會感到唔開心同抑鬱、覺得自己無用、克服唔到困難，同埋覺得自己無辦法享受日常生活。
團隊表示，孤獨感同埋無社交係令到媽媽心理健康受損嘅主要原因，開OT同埋失業反而唔係咁關鍵。
不過，研究員Dr Laura Fumagalli就補咗句：「出奇地，平均咁睇，爸爸們嘅心理健康似乎無受停課影響。」
寫到呢度，我哋都感受到啲暗湧。但編輯Kathy都想幫手澄清兩句，其實研究係話，比起疫情前，爸爸嘅心理健康同媽媽一樣都差咗，只不過究竟小朋友係6月定9月復課，對爸爸們嚟講就無分別～（研究無講點解，如果想知，或者可以問問你身邊那一位～🙊）
參考資料
1️⃣ Campbell, D. (2021, May 31). Covid lockdown school closures ‘hit mothers’ mental health but left fathers unaffected‘. The Guardian.
2️⃣Institute for Social and Economic Research. (2021, May 31). Mothers pay mental health price for school closures. University of Essex.
