Trouble Two? Terrible Two? 一聽就知，兩歲嘅小朋友唔係省油的燈。University of Arkansas的研究顯示87% 的歲半至2歲小朋友，以及91% 的 2歲半至 3歲兒童通常每天至少發一次脾氣 。
兩歲，代表了什麼？
兩歲小朋友天天都有新發現，發現咗就要即刻試，零耐性。呢一份熾熱嘅好奇心有時會令佢更焦急同執著，左一句「NO」，右一句「我要自己做」，有時最後會演變到又喊又踢晒腳，仲會衝口而出：「我唔鍾意你！我唔要爸爸媽媽！」
此情此景，形容2歲小朋友trouble似乎都不為過吖？
然而，咁樣下標籤，對佢哋不單止唔太公道，甚至乎可以話係錯晒重點——因為呢個變化表住小朋友心理發展上正經歷巨大成長，做父母的其實應該拍手慶祝先啱！
由一嚿飯變成小人仔
呢個人仔，以前好似一嚿飯，淨係食瞓痾，但而家佢開始建立自主，心理開始成長，正在建立自己小小嘅情感世界。簡單來講就係：佢開始長大了。
而人嘅情感本身就係複雜、多面向、令人難招架的。大家可以當呢個人仔係「情緒調節」的初學者，佢剛開始學習緊用不同方式去應對強烈的情緒，如恐懼、憤怒、沮喪和悲傷等，當仲未應對到時，發脾氣就係一個自然不過嘅結果。
小人仔正在成長，梗係一件好事，但大家仍然不可避免會覺得棘手。
發脾氣，只係表達內在的一種方式
就好似呢個情況對大家來講應該唔陌生：爸爸媽媽叫小朋友做一啲事，小朋友不合作、狂say NO，爸爸媽媽即時著火，大喝小朋友：「停！唔准再扭計！」呢個時候小朋友會好驚，可能會退縮，同時令佢本身已經有嘅情緒再加劇。
除此之外，父母仲會因為小朋友「失控」而牽起負面情緒，但可能自己都無意識到；同時，父母亦可能會忽略咗小朋友嘅「內在經驗」（internal experiences），即係就咁睇外在行為，小朋友無啦啦發脾氣，確實不可理喻，但佢哋心入面嘅底層發生咗咩事？就係父母應該要去思考嘅地方。
點先知道小朋友嘅內在經驗？
當小朋友情緒爆發當刻，父母最先需要做的是，將小朋友嘅內在經驗放在心上，嘗試去理解小朋友想透過呢個行為表達咩，然後敏銳地回應，可以幫助小朋友唔再被強烈情緒淹沒。
到時候，仲可以趁機教小朋友處理情緒，同點去表達。然後大家好快會發現，小朋友發脾氣會少咗，自己對佢都了解多咗。
其實，父母教養小朋友成長路上總是苦樂相伴。只要換一個角度，就唔會只見到苦，而係可以看到值得慶祝的地方。
資料來源：
Matacz, R., & Priddis, L. (2022). Yes, the ‘terrible twos’ are full-on – but let’s look at things from a child’s perspective.The Conversation. Retrieved 27 May 2022.
