# 88 Celeste （姨甥女，3歲）
「朋友們都愛揶揄我不適合當媽媽，因為我從來都不會讚小朋友可愛，也不會氹細路。而事實上我亦仲未做人媽媽，但就有個三歲多的姨甥女。我地幾乎每天都見，亦是每天跟她相處，讓我更加確信，孩子可愛 (deserved to be loved)，但不需要以『可愛』(being cute)來換取大人的愛，他們需要的其實是尊重。
就在九月初，姨甥女終於要返學。聞說從未曾上過 playgroup 或者 N 班嘅佢，日日都喊住話唔想返學，怕爸爸媽媽唔接返佢，想必是很沒安全感，阿姨希望喺呢個時候畀啲支持佢，於是決定搵日朝早返工前去送佢搭校車。仲記得嗰朝趕頭趕命，一起身就要即刻換衫出門口，然後烈日下狂奔七條街去車站，真係差少少就中暑暈低。不過辛苦並無換來預期回報，阿 B 見到個上氣唔接下氣嘅阿姨，可以話係一啲反應都無，只係擘大對眼呆望我；等校車嘅時候，平時成隻開籠雀嘅佢，一句說話都無同我講過，可以話係視我如無物。
當時真係有點傷透阿姨嘅心：『晨早流流行七條街送你返學，Hello 都唔講聲……』正當我想衝口而出時，腦中忽然閃過一啲畫面。
同親戚朋友食飯，只要在場有精靈可愛、口齒伶俐嘅小朋友，就個個都爭住要抱；但假如小朋友無開口叫人，無表現出預期嘅歡天喜地，親友都不免流露出一副『搞錯呀』、『呢個小朋友真係唔得人鐘意』嘅神色。小時候未能完全理解，都解讀成『我不夠乖』、『我惹大人不高興了』，長大後倒是看不過眼。例如入屋叫人，雖然小朋友需要學會禮貌，但係一個兩三歲嘅小朋友，突然見到一班一年先唔知見得幾多次嘅人，會怕醜都好正常，如果咁啱遇著嘅係粗聲粗氣的長輩，孩子被嚇到亦是人之常情，但往往這些率真的表現很快會被標籤了。
一切只因他的反應不似預期。
我反問自己到底送姨甥女搭校車，是為了滿足自己『想被姨甥女需要』，定係只為咗支持佢？如果係前者咁我嘅付出就係有條件的愛，如是後者，咁其實佢咩反應都不重要了。
當然，佢無表現雀躍的確令我有少少失落，但係孩子的反應背後總有原因。會唔會係佢嗰日發生咗唔開心嘅事？或者好攰好眼瞓？我哋大人成日希望小朋友可以點點點，如果佢嘅舉止唔順自己心意，就覺得佢唔乖、唔得意。但其實幾細嘅小朋友都係一個人，都有自己喜惡，只係小朋友情感表露較直接，唔會戴假面具掩飾。我地大人唔係更應該有胸襟去接受佢地嘅直接嗎？
嗰次之後，我都唔再勉強阿B做佢唔想做嘅事，有時想向她討一個抱抱，佢不為所動，以前屋企人會講笑咁話『唔攬阿姨會嬲架喇』，我現在只會跟她說：『哦，你今日唔想攬呀？唔緊要啦，咁下次等你想抱抱時，話畀阿姨知啦。』」
圖片由受訪者提供
