強逼分享玩具適得其反 品德教育要看時機

分享玩具是好多家長認為孩子必須做到的，因為他們認為一個擁有良好品格同修養嘅人都懂得分享，所以成日都會聽到家長苦口婆心，叫小朋友分享自己手上嘅玩具，但咁樣做就真係可以令小朋友明白「分享」嘅真諦？

強逼分享玩具變小氣

臨床心理學家Dr. Laura Markham指出，原來強迫小朋友分享，唔單止唔能夠令佢地學會慷慨，仲有機會適得其反添，到底點解？大家不妨想像一下以下呢個情境：

有一日你同囝囝去公園玩，仲拎左佢自己架玩具車，就喺佢玩緊嘅時候，有小朋友走過來，想玩埋一份，但不得要領，於是個小朋友仲喊起上黎。唔少家長都會覺得，呢個就係教會小朋友分享嘅好時機，於是你同囝囝講，「我地要學會分享，你借比朋友仔玩下啦，唔可以咁自私架！」於是，囝囝只好遞上自己心愛嘅玩具車，嗰位小朋友當然破涕為笑。你以為咁樣就解決左小朋友爭吵嘅局面，但其實最終對佢地嘅成長原來並無幫助。

對囝囝黎講，佢都未玩夠就突然被人叫停，這次經驗可以話係痛苦嘅回憶，令佢對「分享」有了負面嘅印象。對另外嗰位小朋友黎講，咁樣處理亦會容易令佢以為大喊就可以得到自己想要的東西，連屬於其他人嘅東西一樣可得到。

六歲以下未有分享概念

兒童及青少年心理治療師Dr. Tina Payne Bryson就指出，分享其實係一個相當成熟的行為，首先你要能夠理解別人嘅需要，更要懂得平衡情緒、控制自己的衝動，這些都並非一般六歲以下小朋友所具有的能力。

反而我地有沒想過小朋友唔想分享，可能純粹出於那件物件對他來說非常重要？

其實諗深一層，我地自己都不會無時無刻什麼都同人分享，特別係嗰啲自己珍而重之嘅物件。我地希望小朋友學識嘅並唔係一有人要求，佢就要放棄自己所擁有嘅野，而係懂得喺適當時候，用合理嘅方式拒絕。同時當小朋友見到其他人拎住自己想要嘅野嘅時候，我地亦希望佢懂得控制自己嘅衝動，唔會去搶走人地嘅野。

識得用語言去表達自己，請求對方等待或者同意，正正係佢地應該學會嘅待人接物技巧。

鍛鍊耐性及同理心

咁，我地仲應唔應該教小朋友「分享」？分享當然無問題，但前提係唔好「強迫分享」。加拿大多倫多大學嘅兒科教授Dr. Bill指家長首先要做嘅係尊重小朋友才是那件玩具的擁有者，鼓勵他們自己決定幾時玩夠，用語言表達，當佢地玩夠嘅時候從旁提醒佢有小朋友正在等待，令佢自己意識到其他人嘅心情。

對於一直等待嘅小朋友，這種處理方法亦有好處。要知道兩歲至五歲左右的小朋友仍然未識得控制自己的衝動，得唔到想要嘅野，他們或者會喊會發脾氣，但「等待」正正就係佢地呢段時期需要學會嘅事，呢個亦係練習點去控制衝動嘅好時機。

下次不妨比小朋友自己決定分唔分享同幾時分享，鍛鍊佢地嘅耐性及同理心。

圖片來源：by Ketut Subiyanto on pexels