個案分享：雙面模範生
這次來找我的孩子是一位十歲男生，他是學校裡的模範生，成績名列前茅，獲獎無數，多年來都穩坐全級頭三甲位置。對師長尊敬有禮，對同學也照顧有加，經常幫助成績較遜色的同學。在老師心目中，他是個完美典範，在家長日當天，老師對男孩的評語用三個字來形容「無得彈」。男生家長聽見當然開心，然而，他們卻有難言之隱不敢向老師言明。
男孩子在家裡是判若兩人，他的父母說若果他在學校是一個天使，在家便是魔鬼。他會沒有自制地追看電視和打遊戲機，拿走爸媽的電話大玩遊戲，若然被阻止便會大發脾氣，對家人無禮之餘也會故意欺負弟妹。他在家的行為令家長大為不解。
家長：「我地擔心他的情緒發展，點解喺學校就咁完美，返到屋企變左另一個人，佢係咪雙重性格呀？」
我：「家長覺得人有無完美呢？」
家長：「梗係無，邊有完美嘅人㗎。」
我：「家長你平時返工同喺屋企會唔會有唔同？」
家長：「唔…都會，喺公司面對同事同老闆，點都有壓力，返到屋企先可以做返自己。」
我：「同意呀，返到屋企先可以做返自己，小朋友其實都一樣。佢喺學校長時間係模範生，丁點唔容許自己犯錯，條橡筋一定扯得好緊。返到屋企，看電視和打遊戲機就係佢減壓嘅方法。由於佢唔識得點幫自己面對壓力，喺學校所承受嘅壓力有幾大，返到屋企嘅行為反彈就有幾大，好似橡筋嘅原理一樣。」
家長：「咁唔通俾佢不停打機咩？」
我：「用什麼方法減壓可以雙方商量，一早定立界線；如果小朋友可以堅守界線就加以鼓勵。」
但其實，小朋友行為出現重大落差，重點是要了解「點解佢喺學校要做到完美令自己咁大壓力」。
家長思考了一會：「我地無俾壓力佢㗎，又無催谷，係考試時間幫下佢溫習。」
我：「平時小朋友考得好成績既時候，你們有什麼反應呢？」
家長：「佢有些小聰明，考十名內係正常，如果考到第一都會讚佢叻啦，出街食餐飯慶祝。」
我：「即是話，小朋友考到第一先會獲得稱讚？」
家長支吾以對。
我：「家長平日無催谷小朋友已經有好成績，久而久之，不論你地對佢，又或佢對自己嘅要求都提高左。獎項同名次，對佢嚟講係一個工具，一個令佢被認同嘅一個工具。如果沒有獎項同名次，佢唔知道自己價值所在，所以先俾自己咁大壓力，要長時間喺學校做模範生爭取認同感。」
相信這不光是模範男生的寫照。
別讓成績決定自我價值
學業成績是許多現今小朋友爭取認同感和成功感的地方，但這不應是唯一的地方。若果小朋友的自我價值被名次所主導和控制，就會漸漸感受到壓力，每天為名次和分數而努力，忽略了追求知識的樂趣。同樣地，家長若果只在乎成績表上的數字而忽略了小朋友的努力和學習態度，小朋友會收到一個錯誤信息：「爸媽疼愛我因為我成績好，相反，若然我成績不好便不被疼愛了。」
完美背後所承受著壓力，孩子負擔得來嗎？
當成績決定了一個孩子的自我價值——那便是壓力的源頭。不論是成績較遜色的同學也好，模範生也好，也同樣承受這種感覺。只為爭取認同感的學習，是模範生的擔子，也是愉快學習的阻擋。
