你希望你嘅孩子「善良」嗎？
好多父母第一個反應可能會係：「善良？讀好啲書先啦。」又或者會擔心：「太善良只會畀人蝦！」
確實，如今社會爾虞我詐，太過善良，好容易就會吃虧。
一面倒的善良
記得小朋友出世嗰陣，我最大嘅心願就係希望佢成為一個善良嘅人，但係當佢真係「太善良」時，我心入面又會忍唔住擔憂。有一次佢花咗好多時間幫同學解釋數學概念，結果自己嘅功課匆匆忙忙，做到好夜先完成；又有一次，佢攰到幾乎企唔穩，依然堅持讓座畀一位老婆婆，最後自己企喺度都瞓着咗。
到底我哋可以點教？估唔到最近睇到有篇研究話，孩子善良與否，其實並唔係父母可以「操控」嘅。因為當你決定畀一個充滿愛同關懷嘅家庭去滋養孩子，孩子自然就會比其他人更懂得善良。
父母的愛，為孩子灌溉出善良的種子
劍橋大學最近一項追蹤超過一萬名小朋友嘅大型研究發現：善良，係由愛滋養出嚟。 研究用咗「千禧世代縱向研究」（Millennium Cohort Study）嘅數據，當小朋友三歲時，父母需回答有關親子互動、親密程度嘅問題；之後，研究團隊再喺小朋友七歲、十一歲同十四歲時觀察佢哋嘅行為——例如會唔會幫助人、會唔會照顧朋友感受、會唔會表現出同情心等。
結果非常清晰，同父母關係越緊密，小朋友越容易展現正面嘅社交特質。即使撇除家庭收入、父母教育程度、甚至小朋友本身嘅性格差異，呢個趨勢依然清晰。可見父母嘅愛，的確能夠為孩子心中種下善良嘅種子。
善待他人不等於要冷待自己
不過，隨住小朋友慢慢長大，父母難免會開始憂慮：現實世界咁殘酷，「大愛」真係對孩子最好嘅選擇嗎？其實，善良也許並唔係唯一嘅答案。作為父母，我哋會為女兒嘅善良而感到驕傲，但同時亦會心痛。因為善良值得，但唔代表要善良得毫無界線。
所以，我開始喺教孩子學懂善良嘅同時，教佢哋點樣拿捏分寸——幾時要堅持，幾時要學識愛錫自己。呢個過程，親子關係尤其重要。因為父母唔止係孩子心靈嘅養分，仲係佢成長路上最安心嘅後盾，幫助佢學會怎樣平衡「善待他人」同「善待自己」。
參考資料
- University of Cambridge. (2023, October 9). Young children who are close to their parents are more likely to grow up kind, helpful and ‘prosocial’. ScienceDaily.
- Ioannis Katsantonis, Ros McLellan. The role of parent–child interactions in the association between mental health and prosocial behavior: Evidence from early childhood to late adolescence. International Journal of Behavioral Development, 2023; DOI: 10.1177/01650254231202444
圖片來源：Pexels
