好多人認為今時今日，識用AI先係走在世界尖端，但有一種能力，對小朋友嘅未來可能更為重要：就係Fact check查證嘅能力！
以前父母都會教小朋友「唔好咁易畀人呃」：陌生人唔好信、廣告會誇大、見到連結要小心。但去到今日，當所有問題都可以交畀AI即時作答，如果小朋友唔去fact check，唔識fact check，只係照單全收，先至係最大風險。
「問題兒童」原來是天生Fact Checker
有一個最新研究話我哋知，原來小朋友天生就係一個fact checker！
點解天空係藍色？點解飛機會飛？點解YouTube嗰個人講嘅一定啱？點解唔可以倒轉行路？如果你屋企有個鍾意打爛沙盤問到篤嘅小朋友，以上類型嘅問題你一定唔會陌生。有時大人會覺得好煩，但從科學角度睇，呢啲正正就係一個人與生俱來嘅「懷疑能力」。
最近一項由UC Berkeley團隊發表嘅研究指出，4至7歲嘅小朋友並唔係盲目相信世界，相反，佢哋會睇下「邊個講」、解釋合唔合理，先會決定信唔信。換句話講，當小朋友不停問「點解」嘅時候，其實唔係搗亂，而係做緊最原始、最重要嘅科學訓練：求證。
研究人員設計咗一啲情境，畀小朋友接觸有時準確、有時唔可靠嘅資訊來源，結果發現，佢哋會根據過往經驗去調整信任程度。如果一個來源經常出錯，小朋友會自然降低信任；相反，如果來源可靠，佢哋就會更願意相信。呢種「動態更新信念」嘅能力，其實已經好接近成人嘅理性判斷模式。
研究：「無菌環境」反而削弱查證動力
研究仲發現，雖然來源可靠會令細路容易產生信任，但如果小朋友一直身處喺一個「無菌」嘅資訊環境，身邊所有嘢都係百分百正確嘅話，佢哋反而會無咗查證新資訊嘅動力。咁即係由得小朋友接觸多啲假資訊，佢自自然然就會識分辨真假？想錯你個心了！
研究作者指出，最好嘅方法係喺一個「受控」嘅環境下，畀小朋友接觸有問題嘅資訊，再由大人示範畀佢哋睇，點樣分辨真假。透過累積實戰經驗，佢哋先會建立到警覺心。簡單啲講，要小朋友成為一個出色嘅Fact checker，反而要喺有「監督」嘅情況下，畀佢哋接觸多啲「錯誤資訊」。
更多相關內容：分辨網上育兒資訊真與假，父母有責
日常訓練查證能力
作為父母，我哋可以好好引導孩子將懷疑嘅心態變成fact check嘅動力及能力。例如，小朋友問點解嘅時候，可以同佢一齊搵原因，一齊搵證據，再一齊搵吓有無其他人有唔同講法？又或者當佢講一個你覺得未必正確嘅資訊，你未必要即刻糾正，反而可以問下佢：「真係？不如你證明畀我睇？解釋畀我聽？」呢啲看似隨意嘅對話，其實正正係訓練佢點樣思考，同整理資訊。
當一個小朋友學識由懷疑出發，再自己搵證據，佢面對AI世界，就唔再只係被動接收資訊，而會係一個識判斷、識運用嘅人。喺AI更加深入生活嘅未來，先可以更加保持覺醒，甚至脫穎而出。
＝＝答案：男孩是按女孩的相片製作的AI圖＝＝
參考資料
- Evan Orticio, Martin Meyer, Celeste Kidd. (2024, October 10). Exposure to detectable inaccuracies makes children more diligent fact-checkers of novel claims. Nature Human Behaviour, 2024;
- University of California – Berkeley. (2024, October 10). To make children better fact-checkers, expose them to more misinformation — with oversight. ScienceDaily.
圖片來源：Pexels
