幽默的人有福了：逾5成孩子長大後認同親子關係良好

如果小朋友唔肯執玩具，你會點做？
「我數 1、2、3，你再唔收好啲玩具，我就掉晒佢哋！」
「乖啦，我哋要有手尾，不如我陪你一齊執啦～？」

呢啲招數係人都諗到，唔知你有無試過花啲心思，諗啲奇招？

例如，一人拎一個收納箱，鬥快執，最後仲要磅重，睇下邊個收得多；又或者，將玩具串成一首歌——唱到邊種玩具，就要即刻收返入箱。咁樣一來，小朋友就唔覺得收拾係「沉悶」，而係一場好玩嘅遊戲。

幽默可能係最被低估嘅教養絕招

啲人成日話幽默會令情侶關係更親密，但原來識得搞笑，唔只係拍拖追女仔有用，喺親子關係中一樣係無敵武器。Penn State最近一項研究就指出，幽默可以成為父母同小朋友之間搭建緊密關係嘅橋樑。

研究邀請咗 312 位18 至 45 歲嘅成年人填問卷，問下佢哋父母幽唔幽默，再睇下親子關係質素。結果顯示超過一半人話自己係由「識搞笑」嘅父母養大，當中有71.8% 嘅人認為幽默係非常有效嘅教養工具，而最重要係大部分人都希望自己依家或者將來，都會用幽默陪伴小朋友成長。

數據更加話畀我哋知，幽默父母同非幽默父母，親子關係差距很大！

喺有幽默父母嗰組，有50.5% 嘅人認為自己同父母關係好，仲覺得父母教養得唔錯。但喺覺得父母唔幽默嗰組，只有 2.9% 覺得親子關係好，3.6% 覺得父母教得好。呢個落差，真係好驚人。

身教原來可以邊笑邊做

研究作者進一步解釋，幽默不止是「逗小朋友笑」，還可以做到身教，增強小朋友認知靈活性，讓他們在遇到問題時，懂得轉彎，不會一條路走到盡頭。同時又可以減輕父母壓力，當父母緊張時就會容易火爆，幽默搞笑就是天然的「冷卻劑」。

當然，搞笑幽默唔係育兒嘅萬能Key。比如在正式場合，或者小朋友已經情緒爆煲時，亂咁搞笑反而會火上加油，而且每個家庭文化背景唔同，幽默形式同接受程度都可能差天共地。

但如果搞笑幽默用得適宜，真係可以幫你化解到好多親子之間嘅磨擦。

唔知睇緊呢篇研究分享嘅你，成長過程又有無「識得搞笑」嘅父母？你哋又有無好有意識咁幽默地教育孩子？

圖片來源：Pexels