「你地住幾多樓架﹖攞住咁多野，我幫你撳𨋢吖﹖」「三十五樓吖唔該！」
一個伸到隻手直晒，屹高埋隻腳都只係撳到二十九樓嘅四歲小女孩，話要幫人撳三十五樓個掣。作為父親，當然好想睇吓佢自己點「收科」啦，「懶醒」係要付出代價㗎嘛。但係，係外人面前，筆者梗係會為了成全女兒，把她抱起，讓她一嚐幫人嘅心願！
當一個地方量度一個人是否成功的主流價值，是基於那個人有多少資產，那良好品格又值多少錢？
「爹哋，後面個老婆婆隻腳好似受咗傷，不如你推住度門俾佢啦！我又唔夠力！」一個去party就黎遲到嘅小朋友，唔係只係掛住玩，仲留意到後面有個老婆婆要用拐杖，筆者又點會逆佢意呢！「婆婆，你行先啦！」加埋呢句，婆婆當然讚你啦！順水人情就咁又俾佢攞咗，但係睇到佢幫完人一臉滿足，又真係幾窩心嘅。
原來平時教佢對人要善良，見到人有需要就幫忙，佢真係有記到入心。
孩子天性善良
其實，有研究指出，「施比受更有福」呢種做人品格同價值，比起「自私自利」更容易被小孩接受同學習！一個英國嘅研究，透過調查261個瑞士的家庭同157個德國的家庭發現，父母期望小孩能有善良品格，就係一個預測小孩是否善良的強大因子！即係話只要你肯用「自身」同「真心」去教，小朋友好容易就能「照單全收」，發展出良好品格。更重要嘅係，把良好品格定為教育目標的父母，與子女會有更良好的關係。
喺美國威斯康辛大學麥迪遜健康心理中心，就有一個為期12週的「善良課程」（免費下載），期望訓練適齡兒童發展出善良個性。研究發現，完成這個「善良課程」後，小孩的專注力，同理心都有所進步，令小孩在情緒及社交上的表現都大大改善。
家長應先心懷善意
現今社會，小孩的學業成績被無限放大，品格修行往往被忽視。幫人撳𨋢或是推住度門，也許是筆者平時慣常會做的事，她小小孩子學著爹哋不足為其，但若自己亦未能每事對人都充滿善意，如何「身教」孩子發展出良好品格？所以，筆者都係覺得要先再培訓一下自己，才能每天都跟小孩一起進步，與女兒一起走這一條品格為先的路。
老實說，當一個地方量度一個人是否成功的主流價值，是基於那個人有多少資產，那良好品格又值多少錢？面對這種衝擊，只好堅持自己的信念，以做好自己及教養下一代作為目標，期望良好品格得以承傳下去。
資料來源
- Fernandez, C. (2017, June 19). Kindness really does breed kindness: Scientists find altruism is the easiest value for parents to pass down to their children.
- Spoon, Marianne. (2017, August 28). Preschool “Kindness Curriculum” is now available, free.
Photo by Sandrachile . on Unsplash
