當你睇到呢張通告，第一時間的反應會係點呢？
「嘩，怪獸家長呀，人地唔使搵食！痴Ｘ線！」
「全世界得你同個小朋友喎，一定係啦！除非唔係！」
「呢個鄰居相當有問題🤨！」
諸如此類。
係，呢位鄰居就是在下，我先生姓朱，小姓梁。
話說，在疫情肆虐期間，適逢樓下進行大裝修，每天早上都要在家中網課的我們，裝修的聲浪令我們受到一定程度的影響。
作為母親，能做的選擇不多：
1. 另覓地方進行網課
2. 阿女回校，進行網課
師奶與師傅要交手了
一天早上，厚著面皮衝落樓下，在轟轟隆隆的聲音下大力拍門……
對方一股怒氣地打開門像是要向我衝擊：「咩事？」
「師傅，早晨呀！」不慍不火的我回應。
「師傅，你地拆嘢要幾日呀？小朋友要zoom呀，你講我聽大概要幾日，我哋就一就。」
帶著豬咀的師傅呆一呆，十分有型咁除下豬嘴：「睇怕都要兩三日喎。」
如是者，我們兩母女避走了兩三天。
我們決定到妹妹家進行網課，晨早7點要弄醒女兒，大包小包書包搭車，每上完一日網課，兩母女都疲乏不堪，還要趕回家做功課煮晚餐。不是明智之舉。
兩三天過去了，卻仍是嘈吵到一個點。
鑽牆聲說出了千言萬語
阿女在家哭鬧：「媽媽，我聽唔到老師講咩呀！」
我忍不住了，拿起紙筆，用了一分鐘的時間，寫低幾粒字。現在回看，文字像生氣地抱怨，實在有點不好意思。
我一鼓作氣地衝落樓下，將紙貼在裝修單位門口。
老公放工回來見到我的「大作」，笑說：「改咗名呀，叫阿嬌咩你呢輪？」
到了第二天，張通告被人撕掉了……
係，我可能太天真。係，我師奶仔野蠻世面見得少，離晒地。
到了第三天，早上出奇地寧靜。我們上完網課，我心諗：「今日無師傅開工喎。」
踏入中午12時30分，突然傳來那股熟悉又陌生的鑽牆聲，我會心微笑了一下。
接著幾天，早上仍然寧靜又美好，然後接著準時中午12時30分：「轟…轟…轟…」
我的咀角向上揚，有感而發。
直至我看到師傅們把通告重新貼回門口，欲通知其他師傅樓上住著一隻天真又野蠻的師奶潑婦，想有好日子過，認真要睇路啦兄弟！
微小而美好的事
那一步，看似不切實際，試下其實又何妨？
或許師傅在家也有小朋友要試網課，又或許師傅心中暗駡「爛佬怕潑婦」，太多或許。
無心挑釁，真心誠意，有心人自有知心人。
那天，正在搭棚的師傅遇上正在晾衫的我，兩眼對望，默默點個頭。他說：「我哋一陣就鑽嘢啦，好快啫，唔使收衫啦。」
我笑一笑，點一點頭。
無聲勝有聲。
我相信美好的事，每天都圍繞在身邊，踏出那一步，把它捉緊，儘管是真天真，假天真，得到回應也不枉此行。
打算執筆言謝，今次不能再用一分鐘了。
讓我想想。
