「一家人，使乜咁客氣講唔該呀！」呢句對白我細細個就成日都聽阿媽講。上一代就係咁，愛唔使講出口。
我估我細個都有啲畀呢個諗法同化咗，覺得多謝同愛唔使講出口，尤其係對自己最親嘅人。但人漸漸長大，我發現唔係好對路，喺職場我畀嗰同事搞到一鑊粥，我都仲「唔該」前「唔該」後，「麻煩晒」前「麻煩晒」後，但阿媽等我放工，翻熱啲湯畀我飲，我竟然又覺得理所當然，一句「多謝」極少會講出口，有時仲會覺得佢煩。
後來可能係Shall we talk點醒咗我，我珍惜多咗，講多咗「唔該」、「多謝」，同阿媽關係愈來愈好。
子女說多謝對關係有正面作用
雖然呢個只係我n=1嘅經驗，但原來研究都有相類似嘅發現。美國伊利諾大學的研究人員先前曾探討伴侶之間的感激之情，對夫妻關係品質有正面影響。在一項新的研究中，他們發現感恩的好處，也適用於親子關係。
研究根據593 名已婚或處於戀愛關係的父母調查了感恩表達，與夫妻、父母子女關係的關聯。結果表明，來自伴侶表現的感激之情，與夫妻關係滿意度相關；而孩子較多表現對父母的感激之情，就與作為父母的壓力較輕有關。
研究間接顯示，情侶間對感恩嘅表達，同父母子女之間的對感恩的表現，會對雙方的關係起正面作用，研究指收到子女嘅「唔該」「多謝」，感受到子女嘅感恩，父母對自己角色嘅壓力都會低啲！當我以為施比受更有福，原來接收子女對自己嘅感恩之情，都可以好幸福。
今天就將愛講出來吧
而我，正正因為我同阿媽關係嘅進化，當我有自己個家，有自己嘅小朋友後，我特別意識到要把愛，把感恩之情講出口嘅重要性。
然後我發現：
原來每次我幫小朋友紮辮，佢同我講多謝，我會有一點甜。
原來每次我煮飯畀小朋友食，佢同我講好味，我又會有一點甜。
原來每次我接佢放學，佢同我講開心，我又會覺得好甜。
原來每次我出外公幹，佢同我講掛住我，我就會覺得又酸又甜。
所以，每次佢做我嘅小幫手嘅時候，我都會同佢講多謝，讚佢有乜做得好，希望佢都會感到一點甜吧！
參考資料
- Allen W. Barton, Qiujie Gong. A ‘Thank You’ really would be nice: Perceived gratitude in family relationships. The Journal of Positive Psychology, 2024; 1 DOI: 10.1080/17439760.2024.2365472
- University of Illinois College of Agricultural, Consumer and Environmental Sciences. (2024, August 9). A ‘thank you’ goes a long way in family relationships. ScienceDaily.
圖片來源：Pexels
