有人話，想成就更高，就要將目標定得遠啲、高啲。你或者會諗，如果對個仔嘅期望set高啲，叫佢要考第一，咁就算無第一，都唔會差太遠啦！到底事實係咪真係咁呢﹖
慕尼黑大學有研究就追蹤咗約3500個Grade 5到Grade 10的學童，記錄低家長對小孩嘅期望度及孩子嘅數學成績，仲發現父母期望同小孩表現係成正比，即係話期望愈高，小孩成績就會愈好。咁唔通真係要用第一黎做目標？
咁又唔係喎！因為研究最重要嘅發現係，如果家長對小朋友嘅期望不切實際，遠超於佢嘅能力範圍，反而會令佢壓大咗、成績差咗。例如小朋友嘅學業表現一直都喺下游，但爸媽就要佢下一次考第一，咁佢嘅成績就會不進反退。
試諗下，當你跑400米都喘晒氣時，突然被人叫咗去跑42公里全馬，咁又點會有心機同能力一下子完成呢？但如果由400米開始慢慢「升呢」，咁跑全馬可能指日可待喎。當然，父母對小孩有期望係正常不過，但有時期望係咪合理、係咪孩子能力所及，先至係關鍵。各位家長，要分清楚期望同埋願望呀～
資料來源
- Supplemental Material for Don’t Aim Too High for Your Kids: Parental Overaspiration Undermines Students’ Learning in Mathematics. (2015). Journal of Personality and Social Psychology. doi:10.1037/pspp0000079.supp
- York, I. (2015, December 15). Project for the Analysis of Learning and Achievement in Mathematics (PALMA) Archives. Retrieved from Best Evidence in Brief
