成日聽父母話擔心小朋友用社交媒體嘅問題，但好少聽到父母講自己點用社交媒體。原來，父母喺facebook、IG「曬小朋友相」嘅習慣，都可能對小朋友有某啲影響。
美國中佛羅里達大學一班研究員，以問卷形式訪問咗國內493個有用開社交媒體同時又有10歲或以下小朋友嘅家長，問題涵蓋咗家長同小朋友對社交媒體的使用、家長對share小朋友相嘅觀點同做法、教養風格與性格特質、網絡成癮症等等，最後得出咗幾個有趣嘅研究發現，等我哋又喺度同大家分享下，睇下同大家取態似唔似？
雖然呢班受訪父母裡面，有約9成人會share小朋友相，約1成人唔會。雖然習慣同行為有所不同，但數據顯示呢班家長整體對於自己post小朋友相上網呢件事感到自在，而對親朋戚友share自己小朋友相就「相對自在」，而且都極少反對人哋share相呢個行為。
父母大致上認為喺post仔女相呢件事上面，自己比起仔女應該要有更多話事權，而大部分人post相前，都無事先取得小朋友同意。而比起覺得小朋友會因此感到尷尬，父母們更相信小朋友會享受自己的相片被分享。
研究員發現，父母share仔女相呢個行為，同父母自身喺社交媒體嘅使用，原來都有正面關係。
首先係，一般會經常喺網上share小朋友相的父母，佢哋本身都比較投入在社交媒體之中，並且有更廣闊嘅社交網絡朋友圈可以睇到佢哋嘅post。
再者，父母share小朋友相嘅頻率與父母share普通相嘅頻率的正關聯最強，即係話一個經常share小朋友相嘅父母，佢好大機會平時都會經常share其他相，顯示咗呢啲父母唔會覺得share小朋友相同share普通常有咩分別。
研究員都檢視咗父母share小朋友相以及父母嘅教養風格（parenting styles）同性格特質嘅關係，佢哋發現有幾種父母都會更常share小朋友相，分別係：
1️⃣對個人私隱偏向持開放態度
2️⃣實行「放任型」（Permissive）教養風格*
3️⃣對自己教養能力有信心
4️⃣ 網絡成癮、會因害怕錯過網絡社交活動而引起焦慮
*編按：呢種區分係源自一個叫Baumrind parenting styles的經典理論，教養風格被大致分成4種，分別係權威型（Authoritative）、放任型（Permissive）、專制型（Authoritarian）、冷漠型（Uninvolved），當中放任型係指父母著重接納孩子，但相對很多事都會寬鬆理，就算訂咗規矩，但當孩子行為過界不會介入太多。
想了解更多可以睇返我哋呢條片👇：
研究員亦發現，父母share仔女相呢個行為，同社交媒體嘅環境同特徵，原來都有正關聯。
例如係恆常地share小朋友相嘅父母，通常都會話佢哋朋友圈嘅人，同樣會分享佢哋小朋友嘅相，呢啲朋友亦會share自己小朋友嘅相。同時，呢啲父母都會傾向話自己受到其他人鼓勵去share小朋友相。
研究員有一個好意外嘅發現，就係爸爸竟然比媽媽有更頻密share小朋友相嘅習慣。同時，呢啲好投入社交媒體嘅爸爸比起好投入社交媒體嘅媽媽，會更少有私隱上嘅顧慮。
父母share小朋友相的頻率，與小朋友同社交媒體互動嘅程度都有正關聯。
咁小朋友同社交媒體互動即係咩呢？研究員解釋，包括小朋友喺社交媒體見到自己嘅相、小朋友想post自己嘅相上網、以及父母post相前小朋友被問准等等嘅情況。
呢啲經常share小朋友相嘅父母，認同呢個行為可能會帶來一連串正面及負面嘅結果，包括：
1️⃣陌生人會睇到小朋友的相片
2️⃣小朋友未來可能會因為見到呢啲相而覺得開心同享受
3️⃣亦有可能小朋友會覺得尷尬
但同時，佢哋唔覺得呢個行為會增加咗小朋友相片被利用同挪用的風險，反映呢個對家長來講並唔係一個主要疑慮。
睇咗咁多個發現，大家可能都睇到一頭霧水，心諗「咁即係代表咩？」原來研究有針對呢啲發現進行延伸討論，以下係其中一些，大家有興趣都可以討論討論！
1️⃣ 關於發現三，對自己教養能力好有自信嘅父母，點解會經常share小朋友相？研究員提出咗兩個可能性：
其一，呢啲自信父母，無咁在乎去自己喺別人眼中係咪一個完美父母；因為無呢個包袱，所以會隨心地share小朋友相，想share就share。
其二，呢啲父母因為有自信，所以會想透過炫耀小朋友相以及教養技巧，去維持好父母嘅自我形象，以此獲得朋友嘅肯定。
2️⃣ 發現四顯示，經常share相嘅父母，佢哋社交網絡朋友圈都有好多人會share小朋友相，而且朋友仲可能鼓勵一齊share。研究員提出，父母可能係經歷緊「迴聲室效應」（echo chamber）。
迴聲室效應，又稱為同溫層效應，指的是在相對封閉的環境中，相似的意見不斷重複，令身處其中的人沒有機會聽到相反意見，認為這種單一聲音就是事實，從而令他們更堅持原有的信念或取態。
而今次呢班受訪者，可能就喺一個同溫層入面，朋友之間互相鼓勵做出share自己小朋友相呢個行為，並且互相肯定咗呢種做法！
3️⃣ 關於發現六，年紀細細嘅小朋友咁早同社交媒體有互動，可能導致咩後果？
研究員提出，小朋友咁細就經常接觸社交媒體，可能會導致長期問題。例如佢哋可能會模仿父母嘅做法，到自己有小朋友時，都會經常share仔女嘅相，從而令分享小朋友資訊呢個現象一代一代咁複製落去。而呢啲成長過程中習慣咗「咩都公開」嘅小朋友，會誤以為所有嘢都屬於「公共領域」，自己嘅私隱無受到足夠保護之餘，亦可能會因此忽視其他人喺網絡上嘅私隱權。
參考資料：
Amon, M., Kartvelishvili, N., Bertenthal, B., Hugenberg, K., & Kapadia, A. (2022). Sharenting and Children’s Privacy in the United States: Parenting Style, Practices, and Perspectives on Sharing Young Children’s Photos on Social Media. Proceedings Of The ACM On Human-Computer Interaction, 6(CSCW1), 1-30. doi: 10.1145/3512963
