通常問父母「你哋有無偏心」，家長都會話個個都係自己仔女，點會偏心架。呢種諗法仲無分國籍，美國消費者心理學協會訪問逾400位來自美國及印度嘅家長，超過九成人都話自己對子女一視同仁，不過原來口裡說不，消費習慣卻很誠實。
調查中研究員問家長如果獲得價值$25美金的國庫券，會將佢交俾個仔定女，結果絕大部分父母都會揀同自己一樣性別嘅小朋友。研究員解釋，咁係因為媽媽會更傾向喺女女身上見到自己影子，感覺佢同自己較有關聯，而爸爸同仔仔亦都一樣，於是父母無意識地偏好同自己一樣性別嘅小朋友。
研究推論，當家庭慣常由一位家長負責決定消費開支，咁同性別嘅孩子就可能會比佢嘅手足得到更多資源，長期嘅唔公平更可能會令家庭關係變得惡劣。
其實父母對孩子有偏好都係人之常情，關鍵係要意識到呢個傾向，再時刻留意自己有無因而影響到孩子成長！
圖片來源：Pixabay
資料來源
- Society for Consumer Psychology. (2017, October 3). Do mothers favor daughters and fathers favor sons?. ScienceDaily.
- Vinopal, L. (2017, October 20). Dads Spend More Money On Their Sons Than Their Daughters. Fatherly.
