「老豆，
上次寫信畀你，已經係好多年前嘅事了，嗰陣我仲讀緊寄宿學校，內容大概係話我喺寄宿學校入面見好多事，有好多都印證咗你同我講過嘅道理。唔知你仲記唔記得呢？
今次呢封信，好難寫。因為想同你講嘅嘢，有好多，真係太多，多到唔知由邊度講起。或者就由我細個時講起吧。
出世到幼稚園｜每個孩子都會耍點小機心
好細個嘅事，有好多我都記唔起喇，但仲有啲零碎畫面。
其中一個係喺舊屋，我病咗，你夜媽媽孭住我喺廳度行嚟行去，我迷迷糊糊咁瞓吓醒吓。之後去搬到新屋，我最記得係有時會將廳張梳化搬入去房度，咁我就可以同你同阿媽一齊瞓。
有時我喺廳瞓著咗，你會抱我入房。唔知你知唔知，有時我只係扮瞓著，因為我好想你抱吓我。
小學時期（上）｜你令我好嬲又令我好安心
小學時我覺得你好惡，成日都鬧我，我好似做乜都唔啱咁。
有一次我喺廳度玩緊，你瞓緊，但我玩得太嘈，搞到你瞓唔到，跟住你就好嬲咁走出嚟一手攞咗我件玩具掉落地仲爛埋。我好記得嗰隻係變型金鋼，叫『六面戰士』，我唔開心咗好耐，亦都嬲咗你好耐。嗰陣我都好唔鍾意你，仲喺我哋啲全家幅相度幫你加兩畫變『嬲嬲眼』。
但我又記得二年級盲腸炎，嗰日我一早起身就肚痛，痛咗好耐。你覺得有啲唔對路，送咗我去睇急症。之後醫生入嚟，開口第一句就話：『呢個要做手術～』然後你好快咁就拉咗個醫生出去外面傾，怕嚇親我吧（其實都已經被嚇親了），雖然我都真係好驚，不過當時有你喺度，我個心都真係定啲嘅。
我仲依稀記得你嗰晚話要喺車度瞓，因為醫院唔畀父母陪。雖然話盲腸炎係好普通嘅手術，但幾十年前，應該都會幾擔心吧。
小學時期（中）｜我又怕你，又渴望親近你
有一次唔記得你同阿媽咩事心情好似好好，然後你抱起咗阿媽，好開心，跟住我走咗埋去你度趴咗上你背脊，然後講咗一句：『我又要！』你應該真係心情好好，因為平時你應該唔會抱我，但嗰次你話：『你又要？好啦好啦～』然後孭起咗我。
跟住阿媽講咗句：『你睇吓？你同你個仔玩佢幾開心吖！』我嗰一刻真係好開心㗎，但畀阿媽講中咗，又突然覺得好委屈，委屈到喊咗出嚟。
其實，有邊個細路唔想阿爸阿媽同自己玩呢？
再大啲時，有一晚你同我落咗去球場度打籃球，然後你一手就將個波射到飛過埋鐡絲網牆，我興奮到大叫咗出嚟，當時我覺得只有超人先可以咁大力。雖然細個時好怕你，又好唔鍾意你，但係我仍然好崇拜你，覺得你係一個超人！
即使到咗依家，我都仍然會覺得你係個超人。
當我做咗人大佬
到我八歲，細佬出世了。
嗰陣你同阿媽啲火氣都收咗唔少，以前阿媽會打我，你會鬧我，但阿媽又無打過細佬，你又好少鬧佢，呢個打擊對我真係唔細。我認知嘅世界幾乎完全改變晒，尤其見到細佬可以爬上你個身度玩，而我自小又好少有呢啲機會時，真係會幾妒忌。
我心諗：你哋有無咁大細超呀？公平少少好嗎？
所以我嗰陣係好唔鍾意細佬，而你越話我要對佢好，我就越嬲。當然依家唔會咁諗啦，我想講嘅只係：我好想可以好似細佬咁唔會怕你，可能同你親近多啲。
我記得陣細個都係你幫我剪腳甲同撩耳仔。撩耳仔其實係有啲驚嘅，而且每次都會畀你撩到有啲痛，不過細個果陣，我唯一可以同你親近嘅時刻，就係做呢樣嘢，所以我都唔介意痛唔痛了。
中學｜我是讓你驕傲或失望的兒子呢？
去到中學，我嘅成績一落千丈。仲記得中一第一次期考阿媽同我去見老師攞成績表，真係差唔多包尾咁滯。我驚到鼻哥窿都無肉。由嗰陣開始，我好努力讀書，每年幾十名咁爬返上去。
依家諗返轉頭，我覺得我嗰陣真係已經好努力了，只可惜最後去到淘汰試始終都係升唔返原校。
你嗰陣應該對我好失望吧，又或者係擔心我讀唔成書最後唔知會點。我仲記得你嗰陣鬧我日日喺度傾電話，其實我係同同學一齊溫書，又唔知有得去自修室，咪打住電話咁溫囉，真係出盡力架喇我。
就係因為入唔返原校，達唔到你嘅期望，我對自己完全失去信心了，仲覺得你好似已經放棄咗我咁，搞到我都有少少想放棄自己……」
