孩子怕錯不敢試？父母「容錯」就是孩子勇氣的開關

內容重點

I) 怕錯，是源自大腦的自我保護機制？

II) 重塑大腦，用驚喜擊退失敗恐懼

III) 提供容錯環境，父母可做的「記憶改寫」練習

IV) 參考資料

孩子愈大愈唔敢試？研究咁講：要改變恐懼，有時要「改寫過去」

做父母嘅，可能都有呢個感覺：嬰幼兒學行，總會喺邊度跌親就會喺邊度爬返起身；畫錯線又會再畫過；砌積木最鍾意推倒重來。到佢哋長大少少，明明能力更高，反而愈來愈唔敢試——怕錯、怕輸、怕丟臉。

諗諗下，自己一把年紀，都一樣愈來愈唔想take risk。

怕錯，是源自大腦的自我保護機制？

點解會咁？你以為佢擔心嘅係未來，但研究指出，害怕失敗（fear of failure）更多時，係關於過去，因為經驗為我哋留下嘅痕跡，大腦學識咗「失敗會帶嚟壞事」。例如功課做錯原來會被人鬧，比賽輸咗會被父母比較，又或想試新嘢時被話「唔好搞咁多嘢」等等。

呢啲經驗會變成大腦嘅「預設模式」：試新嘢等於失敗，仲有機會被傷害。當大腦長期處於呢個思維，佢就會啟動另一個保護機制「逃避傾向」（avoidance behavior），唔試就唔會錯，唔錯就唔會被傷害。所以，孩子愈大愈唔敢試，唔係因為佢哋變得膽小，而係佢哋嘅大腦學識咗保護自己。

重塑大腦，用驚喜擊退失敗恐懼

英國心理學會最近介紹咗一個好有趣嘅研究，原來我哋想減少fear of failure，要將大腦嘅深層記憶改寫！十足十好似經典荷李活片《潛行凶間(Inception)》咁！

研究中，心理學家搵咗145個有較高fear of failure嘅年輕人，要佢哋回想童年被批評嘅場景，然後做三種唔同嘅「想像練習」。其中一組最特別，佢哋要重新想像嗰段記憶，再加入一個「意想不到」嘅轉折。例如本來被鬧到喊，但突然有人出現保護佢，又或者本來被否定，但有人溫柔咁回應到佢嘅需要。

結果指出參與「改寫記憶」嗰組效果最穩定、最明顯，尤其係悲傷、內疚、整體distress都有明顯下降。研究作者話成功嘅關鍵係「驚喜」！當記憶嘅結局同大腦預期唔同，大腦就會重新學習。

提供容錯環境，父母可做的「記憶改寫」練習

換言之，我哋想幫助孩子走出對「失敗」嘅恐懼，除了靠想像，更可以喺現實中為大腦製造「驚喜」！當孩子準備面對失敗帶嚟嘅責備時，父母給予完全不同嘅溫柔反應，就係最好嘅神經重塑過程。呢個咪就係成長心態入面成日提到嘅「大腦神經可塑性」！？即係人嘅大腦係可以重塑，通過經驗，去學習到新嘅思維方式。

透過「容錯」嘅經驗，孩子會真實感受到，原來「失敗」並唔可怕。例如，以前做錯功課會被鬧，依家你同佢一齊傾下，了解佢唔識嘅地方係啲乜，再搵方法更好咁進步；以前輸比賽會被責備，依家輸咗，你會先安慰佢失落嘅心情，之後再同佢傾下自己喺失敗中學習到什麼；以前佢唔敢試新嘢，依家你陪佢一齊試，預先講明「衰咗可以再嚟，幾多次爸爸媽媽都陪你」等等。

每一次「重新體驗」都可以係一次overwrite大腦預設嘅機會。父母提供嘅「容錯環境」，將來必會成為孩子勇氣嘅安全網！