話說有一次同阿仔行街，見到有個細路指一個臉蛋有胎痣的女仔，問身旁的父母：「佢塊面點解咁樣嘅？」
雖有云童言無忌，但那一刻，路人立即轉頭望向細路，似是在指責「咁無禮貌」、「講嘢唔理人感受」，而細路的父母也尷尷尬尬。但站在個小朋友嘅角度，可能都一樣無辜，「下……咁我真係有呢個疑問嘛！我食咗誠實豆沙包啫……」
雖然我一直都教阿仔唔好講大話，但我都有動搖嘅時候……
為何教孩子誠實
我無意要做道德判官，我當下諗嘅係，我哋平時係點樣教仔女呢個課題？我哋家長通常會同小朋友講「一定要誠實！講大話係唔啱架，有無聽過《狼來了》故事呀？」（下删1000字）
其實我哋咁樣教導小朋友，無非都係想自己仔女品格好，唔好學識借講大話嚟推卸責任，最緊要知錯能改。
誠實固然是美德。但是不是何時何地都應該坦誠，沒有例外？
事緣我有個朋友同阿仔閒聊，就問下佢：「你平時考試考成點呀？考第幾呀？」阿仔於是笑笑口咁答：「考得普通啦，全部合格。」
朋友聽到後，就收起笑容，好嚴肅咁訓話：「嘩，考得咁差！你係咪掛住玩，無俾心機讀書呀？做咩唔去補習呀？你咁樣唔得架，第時點樣入到一間好中學呀！」
誠實的代價
經過一輪教訓，阿仔由天堂跌咗落地獄。佢呆咗一陣，之後眼濕濕地問我：「媽咪，你教過我唔好講大話，而家我老實咁答佢又話我無溫書。咁其實我亂咁答，佢都唔知啦！」
喺呢一刻，到我呆咗，跟住解釋俾阿仔知，姨姨其實唔係想鬧你，只係想解釋你聽個問題或者解決方法。
但我心底同時好明白，從阿仔角度睇，自己本身好天真咁諗住同姨姨閒聊下，你問我，我就老實答你，無諗過會因為咁俾人「哦」咗10分鐘。
呢個時候，我都需要承認，雖然我係教過個仔唔好講大話，但我都不禁動搖了。
大人世界是例外？
畢竟，大人嘅世界都唔係咁運作。試想，喺你忙到七彩時，老細問你有無跟到個新客，但因為人手唔夠，你暫時應接不暇，諗住盡快會跟返，你都唔會一五一十答老細「無呀，因為我無時間」，取而代之嘅可能係有技巧的「跟緊跟緊」。
又譬如有個新相識問你家庭背景，或者係有人向你探問一件事而你卻一早答應了朋友會守秘密，此時，你都可能會插科打諢就算。
我唔敢講講大話無錯。但阿仔終有一天都會成為大人，如果佢日後都學識了呢種「精明」，喺無傷大雅嘅閒聊入面，運用下語言藝術，我唔會怪佢。但如果係傷害別人就一定唔得。
阿仔，人生路漫長，有好多嘢都唔係非黑即白。當你長大了，向邊個人坦誠、坦誠幾多，係你自己嘅選擇。待人處事，慢慢經歷和學習吧，媽咪都會同你一齊學。
投稿人：菠蘿包mami
圖片來源：Unsplash
