成日有媽媽問我哋，餵母乳期間，係咪要戒口戒得好清架？XXX食唔食得？YYY又係咪要避之則吉？我哋同好多媽媽一樣都有疑惑，於是搵咗好鐘意睇研究嘅爸爸科豆 ，同大家一齊尋找答案。
今次就等我哋先講香港人最鍾意嘅飲品之一：咖啡！
以下係科豆同心急人嘅對話。
心急人：「餵母乳， 飲唔飲得咖啡㗎？」
科豆：「『最好唔好啦』——呢個係英國國家醫療服務（NHS）嘅標準答案。但問得呢條問題嘅人，一定係對咖啡有啲喜好嘅媽媽，或者係知道太太有咖啡癮嘅爸爸，佢哋又點能夠滿足於『最好唔好啦』呢個答案呢？」
其實，如果真係要飲咖啡，NHS都俾咗一個份量大家參考，就係每日盡量 #不要攝取超過300毫克嘅咖啡因。
心急人：「咁300毫克咖啡因，即係幾多先得架？」
科豆：「大約2至3杯連鎖店嘅咖啡啦。」
心急人：「哦，一日2至3杯，即係唔洗特登戒啦！Yeah！」
科豆：「咁又未必！因為唔係淨係咖啡先有咖啡因㗎！
某些茶、汽水、能量飲品，甚至是朱古力都有唔同份量嘅咖啡因㗎！
所以，唔可以單計飲幾多杯咖啡，仲要睇埋媽媽其他飲食㗎。
記住記住記住，千祈唔好一口咬定2杯就唔會出事呀。」
最後，請大家都唔好忘記，如果媽媽攝取過量咖啡因，通過母乳被寶寶吸收了的話，係會令寶寶不能安眠架。（潛台詞：BB無得瞓，即係大人都唔洗瞓喇……）
POPA小百科
英國 National Health Service（NHS），即是英國國家醫療服務體系，是世界上最大的醫療機構之一，而我們今次參考的Start4Life是由NHS支持的一個網站，於2012年開始為父母服務。他們的使命是讓父母更容易獲得有關懷孕及育兒的可靠信息，並以健康的方式撫養孩子。
參考資料
Healthy breastfeeding diet. (n.d.). Retrieved from Start4Life
圖片來源：Unsplash
