#144 Lily Lam（教育工作者，兒子5歲、女兒2歲半）

「我係一個加拿大回流返香港嘅媽媽，仲係一個奶粉媽媽。我知道以下落嚟要分享嘅故事，應該會觸動部份媽媽嘅神經，但我仍然好想畀思考緊餵母乳定奶粉嘅媽媽見到。

Breast is BEST？

喺我以前住過嘅加拿大小社區，兩年前發生過一單初生媽媽失踪案。個媽媽生完出院無耐，就突然唔見咗，鄰居們發揮小社區嘅力量發散人手去搵佢，兩個星期後，終於喺湖邊搵到佢……嘅屍體。

後來佢先生透露，太太生完之後，一直都餵唔到母乳。咁啱當時嘅加拿大就好似依家嘅香港咁，吹起咗一陣『唯有母乳才是最好的』嘅熱潮，推廣母乳好處嘅廣告無處不在、無孔不入，而最感受到呢股力量有幾勢不可擋嘅地方，當然就係醫院。

嗰位媽媽自己餵唔到母乳，但醫院房門口就大大幅海報寫住 “Breast is BEST”。佢日日望，個腦就日日諗，覺得自己畀唔到最好自己嘅BB……

我都係人哋媽咪，我明白，產後嘅荷爾蒙原來真係會好影響你，諗嘢好容易會諗埋一邊；當你受到好大壓力，枕邊人又未必理解，就係嗰一下，隨時抱埋個BB跳落去架喇。

不親餵就是懶媽媽？

我慶幸自己無經歷過呢啲掙扎。

因為我打從一開始，就對母乳無咩執著。我雖然都有泵奶畀BB飲下母乳，但我一次都無試過埋身餵，亦都一開始就有補奶粉。因為我會諗，泵奶或者補奶粉，先生或者其他人就可以幫到手。要我每兩個鐘就要埋身餵？其實啱啱生完，我真係好需要休息。

我知道有啲人會鄙視我呢種諗法，覺得我好懶。就連我嘅好朋友都會暗示：『辛苦啲都係應該，我都餵足一年架』、『呢個係媽媽嘅天職』，意思係勸我要親餵。我話，但我得返7個星期產假，而你喺加拿大有整整1年。有時，有啲嘢真係無得比較。

我諗，我之所以會抱持呢種非主流嘅信念，係因為我接觸過太多媽媽，我知道佢哋有幾辛苦，亦知佢哋有幾大壓力。我見過有啲媽媽發晒炎、損晒流晒血，唔係佢唔想餵，但真係餵唔到；有啲可能因為開刀呢，啲奶未必上得切架嘛。但係身邊就會有聲音同你講：『咁你一定係因為未夠努力。如果你再努力啲，就一定餵到！』

情況同開刀定順產有啲似。咁有啲人認為順產先係最自然，而你順產唔到，都係因為你唔夠努力——『自古哺乳類動物都係咁生架啦，邊有人會幫佢地開刀？』，又或者『係你唔敢為BB冒險，怕痛，無將小朋友放喺第一位』。

初心一樣，只是選擇不同

但係有啲人真係無法自然分娩，例如天生盆骨位較窄。我媽就係咁，所以佢都係開刀生我，而我亦遺傳咗同樣體型，最後都係開刀生。我亦都唔止係奶粉媽媽，仲係奶粉BB，但我絕對唔會因為咁，就覺得我媽無畀我最好嘅嘢。

當然，我都好尊重堅持母乳的媽媽，覺得佢地好偉大好犀利。只不過我同樣相信，你有你嘅選擇，我有我嘅選擇；唔需要比較，唔需要批評。

順帶一提，我以前住嘅加拿大小區，雖然 “Breast is BEST” 海報依然鋪天蓋地，但係卻多了一種新聲音—— “Fed is BEST”。其實每個媽媽都一樣，盡咗力，就已經係最好。」

圖片來源：unsplash