仔女事事驚青 家長如何化解孩子恐懼情緒？

仔女總是不時出現恐懼，你或者都經歷過以下呢個場面，教仔仔踩單車，跌跌碰碰少不免，但佢擦傷少少，就喊到收唔到聲，乜都話驚驚，仲唔敢再嘗試。有家長會喝令孩子馬上收聲，亦有家長會好有耐性咁安撫孩子，不過講到絕招，梗係「轉移視線」！只要同小朋友講：咁我地唔踩單車，去食雪糕啦，大部分時候都會即時見效，但你有無諗過咁做，係咪真係可以幫孩子處理不愉快嘅經歷同情緒呢？

轉移恐懼有效嗎？

加州大學洛杉磯分校精神病學教授Dr. Daniel J. Siegel認為，「轉移視線」根本不能幫孩子淡忘受傷的記憶。試諗下，當小朋友踩單車跌倒，仲喺強烈嘅驚慌情緒之中，父母無話佢知要點處理，仲叫佢「去食雪糕」，之後亦唔再提起，以免舊事重提會令佢更加不安。當刻小朋友好似無事咁，但其實驚慌嘅情緒根本無梳理過，只係放埋左一邊，有時呢啲恐懼感更加會遺留下來，甚至在心中不斷累積，最終以其他形式浮現，例如小朋友會變得容易發脾氣、發噩夢等等，亦可能會小小事就產生恐懼。

事實上，孩子如何理解他們的經歷，不僅取決於發生的事情，還取決於父母對這些事情如何反應。咁家長應該怎樣做才可以幫孩子化解恐懼？

複述恐懼經歷緩解情緒

原來「齋talk」就得。Dr. Siegel建議父母可以與孩子討論他們的經歷，幫他們理清事件順序，並將感受、情緒用言語講出來。這種透過分享經歷黎安撫情緒的方法，Dr. Siegel稱之為「複述故事法」，究竟為何「講」這麼神奇？

從神經學角度來說，人類的大腦各司其職，有區域掌管喜怒哀樂等各種情緒，亦有掌管邏輯思維嘅部分，Dr. Siegel認為只有各個區域能整合，成個大腦好似團隊一樣運作，孩子處理事情時先唔會變得太死板或者太情緒化，而複述經歷正是幫助孩子，將情緒轉化為言語，從而擺脫受情緒支配的狀況。當孩子能夠詳細述說令他恐懼或者不開心的事情時，佢其實係理順緊啲細節，用邏輯思維去重訪情緒。通過這種方法，就可撫平情緒了。

有啲家長會問，我小朋友仲未識得好好表達自己，咁點算？其實即使係幾個月大的BB，一樣可以經由媽媽幫佢重述說發生左咩事來緩解情緒。除了複述故事，父母還可以溫柔咁安慰孩子，提醒他要下次可以點樣避免事件重演。

不過，有一點很重要，如果孩子當時不願意講，父母都應該尊重孩子，由他們決定什麼時候說、怎麼說。最重要係比小朋友知道，當佢地有不快、擔心等等嘅情緒，想搵人傾訴，父母隨時都會喺佢地身邊聆聽。

每個父母都希望保護自己的孩子不受任何傷害，但我們都知道，在孩子的成長過程中一定會經歷一些艱難時刻，他們會摔到，會受感情創傷，會受到驚嚇，會悲痛，也會憤怒。事實上，正是這些艱難的經歷，促使他們成長並認識這個世界，與其極力保護他們免受挫折，倒不如幫他們將這些經驗及情緒整合，並從中有所得著。

圖片來源： Unsplash