仔2歲半，唔肯刷牙，唔肯訓覺！
⚡「6A 品格教育」認證講師Sunny的解答⚡
你好，記得我自己嘅小朋友喺 2、3 歲嘅時候都有出現過類似嘅行為……
每晚去到刷牙時間，佢都會唔願去刷，就算勉強刷完，佢都唔願去訓。起初我同太太都好頭痛，尤其太太係一個需要早瞓嘅人，每晚一諗起要同阿仔講「刷牙」兩個字，都會提心吊膽，真係一啲都無誇張。
明明我已晝夜無間照顧個細路，夢想中的彼岸為何還未到
曾經有一段時間，我哋好似進入咗一個無間地獄咁，一個星期有三、四晚發生同樣嘅事情，客客氣氣、溫溫柔柔講唔聽，總係要惡言相向，搞到皆大不歡收場，最後大家都要忟忟憎憎咁入睡。
阿仔，點解你硬係唔去瞓呢？後來我察覺到有啲時候阿仔會比較合作，但有啲時候就會好抗拒。
經過一段時間嘅觀察後，我發現如果太太喺當晚有陪阿仔玩嘅話，阿仔就會比較合作。但如果該晚時間唔夠，草草陪伴後就要去刷牙瞓覺嘅話，阿仔就會好抗拒。
原來，阿仔係渴望媽媽嘅陪伴！
魔鬼在細節？孩子唔肯刷牙有原因？
刷牙對阿仔嚟講，就好似一個警報咁，因為一刷完牙，就要瞓，瞓醒之後，就見唔到要返工嘅媽媽（只剩下佢嗰個不懂溫柔嘅老竇，即係我），而佢仲未喺媽媽身上得到足夠嘅陪伴，於是萬般不捨，有如生離死別。
自此，我就盡量製造多啲機會俾媽媽同阿仔喺夜晚時候嘅相處（例如主動霸晒啲碗嚟洗），結果情況的確慢慢好轉。
找到原因就能Happily Ever After…？
現代都巿人工作時間長，人多車又多，單係撘車都已經用咗唔少時間。當完成咗一日嘅工作後，真係身心疲憊，有時面對住小朋友對我哋嘅強大需要，唔多唔少都會有啲力不從心。而且小朋友腦部未發育完成，情緒唔會似成年人咁相對穩定，有時我哋嘅「好小事」，會係佢哋嘅「大件事」。當呢啲情況出現時，父母就更會覺得難捱。
所以即使知道咗真正原因，亦唔一定能夠從此「過住幸福美滿嘅生活」。就算到咗阿仔而家 5 歲，佢仍然會偶爾「賴皮」唔肯去刷牙瞓覺。有時，會係因為我同太太因為忙亂，又慢慢忘記咗要滿足阿仔對我哋嘅需要（當然，有時只係純粹因為阿仔嗰日心情唔好）。
父母都會倒退，何況孩子？
所以有時退步嘅唔係阿仔，係我同老婆。
一諗到咁，如果身為父母都可以退步，咁更何況小朋友呢？
所以如果當孩子情況出現倒退，唔好太在意，更加唔好責怪小朋友：「你之前明明已經長進咗，點解依家又打回原形？」
人嘅成長，其實就係「進進退退」咁進行，只要進多過退，就已經足夠。
另外亦可以刻意安排一啲小朋友會期待嘅活動喺刷完牙之後做，咁樣會更容易養成習慣。
為孩子培養睡眠習慣的小活動
我哋就選擇咗講睡前故事，每晚刷完牙，我哋會畀阿仔揀一個故事，然後陪佢一齊睇、講、玩。到咗而家，阿仔已經習慣咗我每晚同佢喺床度講故事，講完之後，佢都會合作去瞓。
我同老婆都開始視呢個親子活動為我哋一家人完成一日嘅「儀式」。無論嗰日過成點，大家當日心情好定懷，每逢去到故事時間，我哋都會暫時放低所有嘢，唔畀負面情緒影響，盡可能令大家帶住笑意咁入睡，為一整天劃上一個靚靚嘅句號。
不過我哋都花咗好一段時間先能夠真正「養成」呢個習慣，如果有一晚我無講故事，我會覺得周身唔舒服。要訣係嘗試令自己都享受個過程，千祈唔好以「應酬小朋友」為出發點去進行，因為辛苦自己之餘，小朋友亦會好易察覺，大大降低果效。
寄語：父母都是瘋狂的
愛因斯坦講過：「『黐線』（瘋狂）嘅定義，就係當你不斷重複咁做住同一樣嘢，而又想得到唔同嘅結果。」其實父母好多時都一樣，不停重複又重複咁對小朋友做同樣嘅行為，然後希望一日小朋友會「忽然醒覺」。
可悲嘅係，小朋友真係會有日醒覺，唔再同父母對抗，父母以為小朋友終於長大明白事理，但事實係小朋友已經被同化，他朝一日成為父母之後，會用同樣嘅方式對自己嘅子女。
如果我哋留心一吓自己嘅言行舉止，其實唔難發現自己好容易犯咗呢個毛病。所以假若有一日，大家察覺到自己同小朋友經常重複出現某一啲磨擦，而每次都係差唔多嘅演變嘅話……咁好有可能係代表住：你要換過第二個方法喇。
圖片來源：Pexels
