#23 KK（育有一子一女）

「阿仔八個月大識得叫『媽媽』，一歲半已經講到完整句子，但脾氣極大，有咩唔啱心意，佢就好似喪失語言能力咁，只會不停咁尖叫喪喊。一歲左右，佢發脾氣，試過撼頭埋牆、扔玩具嚟發洩；依家四歲更會「砰」一聲閂埋房門，嬲晒全屋人，咩人叫佢都唔理，甚至郁手打人。

我試過平心靜氣咁同佢講道理，又錫又氹，但完全無用。我心諗：既然『敬酒唔飲飲罰酒』，咁我亦唔使同佢客氣，就開始大聲鬧佢、罰佢，甚至恐嚇要打佢（恐嚇咋……）但呢啲方法嘅效果都好短暫。平靜一陣，過後又係不斷重複嘅狂風暴雨。

直至幾個禮拜前嘅某一日……

嗰日下晝，阿仔又突然喪叫大喊。我問佢咩事，佢又唔講，一味喊、喊、喊，搞咗廿分鐘都無人知佢喊咩，喊到我心都煩埋。終於我忍唔住勁鬧咗佢一輪，先知道原來係工人姐姐執房時，唔覺意拆爛咗佢個Lego機械人。知道咗原因之後，我仲嬲！大佬，佢已經四歲大喇！嬲咪講咯，做咩好似個BB咁淨係識得喊啫！於是，我繼續鬧，但鬧嚟鬧去其實都係嗰三幅被，鬧到後嚟都唔知講咩好，就爆咗一句：『唔該你好好管理一下自己嘅情緒！』

講完之後，我自己都想笑。『管理情緒』？肯定係平日睇埋睇埋啲育兒資訊，跟住唔知邊度漏出嚟嘅字眼。四歲人仔，點會聽得明？

不過，奇怪嘅事，就係咁樣發生。幾日之後，阿仔因為唔肯出門口，跟住又發脾氣。我如常咁催佢，佢亦如常咁跑入房，但過咗一陣，他竟然拎住張紙行番出嚟，然後用膠紙貼咗張紙喺我心口。

一睇，上面咩都無，只有一個大交叉！

無端端收到個大交叉，場面實在太搞笑，我當堂已經熄晒火，而阿仔嘅情緒亦明顯平伏過嚟，仲變得相當合作。

自從嗰日開始，阿仔每次想發脾氣，就會畫個大交叉畀我。有次佢嬲得滯，入房連畫咗十幾個大交叉，仲貼咗個裝蠟筆嘅膠袋上去。我問佢，呢個咩嚟？佢話係炸彈，然後陰陰嘴咁笑住行開。

『管理情緒』呢個詞語，聽起嚟鬼咁深奧，但原來四歲人仔不但能夠明白，仲識得活學活用。佢呢個自創嘅『管理情緒』方法，既成為佢嘅下台階，亦成為我嘅滅火器。」

圖片由受訪者提供