內容重點

#213 靜心 (一孩之母)

「又唔想返學？點解你個個星期一都扭計唔返學㗎？幫你請一次假可以，但唔可以次次都請假㗎嘛，到時就校長打電話嚟㗎啦…！」一早起身聽到阿仔喊住話唔想返學，我就反眼，內心翻滾，好想開佢波！

其實，阿仔逢星期一扭唔返學呢個情況，已經持續咗一段時間。我開頭都好努力去諗方法，同佢講學校有咩好玩，有好多朋友等緊佢，又有錫佢嘅老師，放學返到來屋企就見到媽咪㗎啦～又試過用零食成功吸引佢返學，但似乎都係治標不治本，唔夠幾日又回到當初，情況開始令我擔憂……

兒子想要媽媽在身邊

阿仔仲開始出現皮膚問題，又經常肚痛，佢由本身願意自己瞓覺變成唔願意喺自己房瞓覺。作為媽媽，自然擔心係咪阿仔有些內在情緒係我哋唔知道嘅。我開始諗下到底最近有無發生咗咩事令到阿仔咁反常？我個腦入面出現咗個聲音：「係咪因為我最近開始上堂，少咗陪佢，佢唔習慣呢？」

所以當今個星期一同樣的場面再次出現，我無再反眼，無再大聲話佢，而係問：「你係咪想痴住媽咪呀？」此話一出，阿仔就開始眼濕濕。「係咪最近媽咪少咗時間陪你，你唔習慣呀？」佢答話「係呀～」然後喊得更淒涼。

我再同阿仔講：「媽咪都好唔習慣㗎，媽咪自己出街果陣都會諗：阿仔呢？唔喺我身邊嘅？不過媽咪提醒自己唔係無時無刻都有你喺身邊，你亦都要學習同其他人相處，習慣有時係會無媽咪喺身邊。屋企有工人姐姐照顧你，媽咪好放心，媽咪上完堂就會返來陪你。」

最後，我提出建議：「由今日開始，媽咪喺屋企嘅時間一定盡全力來陪你，去公園都全程陪住，就算要跑步，都只會留喺你見得到的地方，你覺得咁樣好唔好？」今次傾完，阿仔就好乖咁返學了。諗返真係捏一把冷汗！

媽媽自白：家庭以外，我也想有自己的生活

可能有人會問：既然仔仔仲咁需要你，點解你仍會決定繼續自己上堂唔陪佢？

其實阿仔快將5歲，我曾經每日就係返工放工同湊仔。兩年前，老公希望我全職湊仔，而我很幸運地搵到一份可以在家工作的兼職工作，亦因為咁我連和同事喺pantry吹水嘅機會都無埋。朋友們都好羨慕我有呢份工，的確感恩，有丁點兒收入又可以照顧到個仔同屋企，而當時我係未有工人姐姐幫手的。

但試問又有幾多人懂得全職媽媽背後的苦？在這幾年照顧兒子和屋企的日子裡，我完全忘記了我自己，忘記了約朋友吃飯逛街，忘記了和老公約會，忘記了自己的興趣，連我自己都開始頂唔順呢種「不見天日」的日子！

放手，是為人父母的功課

幸運的是我認識到一班相同理念嘅媽媽，佢哋教識我小朋友嘅適應能力比我哋想像中更強，能承受的事也比我們想像中多。好多時反而係我哋投射咗自身嘅情緒去諗：死啦，個仔會唔會爆喊㗎？工人會唔會搞唔掂㗎？

於是，我在今年定了新目標給自己：發掘自己的興趣，多花時間在自己身上！學習平衡和放手，同時畀機會阿仔慢慢學習自己去探索世界！

Happy mom, happy son

以前嘅我出門個多小時，就會如坐針氈，好想快啲返屋企陪仔，甚至會覺得對個仔唔住。當我真係推自己去實行目標嘅時候，內心都有過好多掙扎，五味雜陳，有愧疚、有擔心、有質疑等。同時間，我又好開心、好喜歡呢個自己，我欣賞自己講到做到，我欣賞我自己勇敢踏出第一步，為自己的人生做出新改變。我相信有身心健康嘅媽媽，才會教養出健康快樂嘅孩子！