跟POPA編輯講起，說我想寫一篇關於夫妻關係的文章，她說好。然後我話，但這篇我係想講「從我隻雀學到如何做一個好老婆喎，會唔會好騎呢？」點知她笑著說：「會，但符合你人設。」好，咁我寫。
話說我家養了兩隻小鸚鵡，一男一女，帶回家的時候已經是一對。男的那隻我暫且叫他「賤男」，因為佢確確實實是一個賤男。我數過了，佢閒閒地有五大罪名。
賤男的五大罪名
罪名一：自私。看見喜歡的零食一定快快搶，就連老婆口中的都會搶；
罪名二：控制狂。自己食完嘢回鳥籠了，便會開始狂叫，催老婆快啲返屋企，老婆要拿拿臨食埋幾啖飛返去；
罪名三：臭脾氣。自己食緊嘢，見到老婆跳埋嚟就會想打佢；
罪名四：污糟。經常唔沖涼（係呀，雀仔係會沖涼），成身雀味，又有頭皮（羽屑）；
罪名五：懶。永遠只有老婆幫他抓痕，到老婆叫佢幫手就會擰轉面扮睇唔到。
衰嘢好多，但他有唯一一個賣點：靚仔。我唔知雀界點分靚唔靚仔，但我只係諗到呢個原因，otherwise老婆唔會忍得到佢，但當我感嘆老婆要忍足佢一世時，我看透了當中的一些微妙之處。
老婆身上看夫妻之道
1.Let it go
我哋先由第一個罪名開始講。我稱「瓜子」為雀界的薯片，薯片喎，邊個唔鍾意？所以每次我見到賤男一口搶走老婆口中嘅瓜子時，我真心替佢不忿。但原來唔係人人都中意食薯片㗎！
有次偶然間我發現，就算有瓜子擺喺老婆面前，佢都未必會食，反而會揀其他堅果。我頓時明了，自己本身並不在意的，不妨let go，無需要為此同老公嗌交傷感情。
2.真正拿捏相處節奏
到第二個罪名。有個控制狂另一半，可以點頂？
以我觀察所得，每當賤男催佢時，老婆就會食快啲；賤男叫完了，老婆又放慢返；再叫，又快少少（扮下嘢咁啦）。最重要是，食完了，會立即飛返屋企，仲要走埋去老公度錫返啖。嘩，呢招高呀。明顯佢好清楚點樣安撫個老公，但配合佢之餘又唔會忽略自己需要。
3.適當時候給老公上一課
臭脾氣的男人，無論出口定出手，都真係唔要得。初初開餐時，老婆慢了一步，想埋去一齊食的話，通常都會被賤男出口鬧甚至出口啄。
到後來，我見老婆學精了，比賤男先一步埋位，到老公跳過來時，老婆會毫不留情地鬧佢。可能有換位思考，可能賤男終於都發現自己衰，慢慢竟然開始留返個位畀老婆，兩個可以開開心心咁食餐飯。原來，有時適當地表達自己感受，對方還是會聽到的。
4.接納彼此的不同
老婆好鍾意乾淨，幾乎日日都沖涼。放一盤水，佢就會自己跳入去游（其實係行）幾個圈，所以身上的羽毛保持得又白又滑。但隻賤男呢，一直以來我都未見過佢落水，頂多老婆沖緊涼嗰陣，在岸上做下假動作。所以，可以話，佢成世雀都未沖過涼！
但奇妙之處係，呢個咁愛乾淨的女人，從未嫌棄過佢呢個老公。不只經常出雙入對，更會出口幫佢整理羽毛。可能佢睇到的，不是一個唔中意沖涼的老公，而是一個唔中意沖涼但又會陪佢沖涼的老公。我諗，夫妻間就是要接納彼此的不同，同時要欣賞對方的付出。
5.默默付出的回報
互相為對方拗痕，係雀界表達愛意的方式。但係，起初好一段日子，我都沒有見過賤男幫佢老婆拗痕。每次我見到的畫面都是，賤男被服侍到羽毛都鬆起晒（就是很爽的樣子），然後到老婆等待回報時，賤男就會望向另一邊準備瞓覺。但老婆沒有發脾氣，反而開始自己拗痕。
我呢啲愛與正義嘅化身，見到當然唔抵得，但一隻雀又點會聽我講。不過，我發現，付出原來真係有回報。有一日我竟然見到賤男幫老婆拗痕，更愈來愈賣力。
學做蝕底的另一半
我望完對雀，嘗試用另一個角度去睇下自己個老公時，我發現很多時都是自己不自覺的放大了他的大意、他的自私、他的壞習慣。但係，原來當我先行出一步，先關心他、先讚賞他、先理解他，所有嘢又會變得不一樣。
可能你會話：點解一定要個老婆做先？係咪女人就係要咁卑微？唔好誤會，我無話一定要老婆做呢個角色，做人老公嘅一樣可以行呢一步。
先付出嘅一方，固然可能覺得會蝕底，但我相信喺一段仲有得救嘅關係入面，要真正止蝕，唔再消耗尚餘嘅情份，就要有人先踏出第一步，放下計較，咁先有機會令關係進入返一個「好循環」。
呢隻雀只有一歲，但我唔知點解佢做人老婆／伴侶咁叻。或者，係我太唔叻。
圖片來源：Pexels
