今次，筆者決定冒俾太太鬧嘅生命危險，都要出講出呢個小故事，目的係為咗講俾大家聽，老婆講嘅嘢，老公最好都係乖乖聽……
四年前……
老婆：「老公，我煮緊餸，你同個女講下故事啦！」
科豆：「佢先得嗰六個月，邊識聽故事唧！」
老婆：「你又唔係佢，你點知佢唔識呢？話唔定會令佢叻女啲呢～」
科豆：「無研究話同6個月大嘅BB講故事有用架喎！」
老婆：「你成日都話自己係科學家，無人研究過咪自己試下囉！」
一向都算聽老婆話嘅筆者，聽到老婆講野嘅聲線已經大過個抽油煙機，仲唔即刻搵本書同個女講故事咩！
既然決定咗要做，筆者就會盡力做好，筆者將一頁只得一句嘅幼兒故事，講得繪聲繪影，配合埋連嬰兒都做到嘅自創動作，例如有攀爬畫面就舉高佢隻手fing下佢隻腳、坐車嘅顛簸畫面就變成係大脾輕力震動佢、飛天畫面當然就變成舉佢上天嘅驚險動作啦。
「共讀」擁有兩個元素，只讀而沒有互動的話，也許只完成了一半！
筆者仲會幫故事配樂。黑夜星空嘅畫面就唱返首”Twinkle twinkle little star”、划船畫面來著悠揚嘅”Row row row your boat”、有吊橋嘅畫面仲唔係跳躍嘅”London bridge is falling down”！？加埋「falling down落張床」呢個秘密武器，阿女真係笑到「四萬咁口」！
就算每日都講同一個故事，佢都唔會悶，直至一天，筆者竟然發現，未識講野嘅女兒竟然記得有某一個動作未做，或有某一首歌未唱，而不讓爸爸揭去故事書的下一頁。
四年後……
科豆：「老婆，你睇下！」
老婆：「有乜好睇？」
科豆：「你睇下呢個研究！」
老婆：「我餵緊個細女食奶，研乜野究唧，你自己睇飽佢啦…」
太太無時間聽，唯有寫出來同大家分享：原來BB六個月大開始，就已經可以從「共讀」中獲得好處㗎！紐約大學（NYU）醫學院的兒科助理教授Carolyn Cates發現，即使仍在嬰兒時期，共讀都能使嬰兒將來對閱讀，語言及識字有長久嘅正面影響。Dr. Cates進一步指出，跟嬰孩共讀，最好選擇合適嬰孩年紀的書，講嘅時候同時指著那件物件、那個人物或他的面部表情，若能再加上一點互動效果會更好！可以想像，如果只係沉悶咁將本故事書讀完，咁只係完成咗「讀」個一部份。要完成埋「共」，就要發揮自己嘅創意小宇宙，係讀故事嘅過程中加入不同的互動元素，使小孩真正感受到他正在與你「共讀」，不單單只是一個聆聽者。
研究顯示共讀好處可以維持達到四年後，筆者不得不驚嘆共讀嘅威力，同埋……女人嘅直覺。畢竟，太太四年前已準確咁預測到四年之後先發表的研究結果！
資料來源
- American Academy of Pediatrics (2018, February 21). Reading with children starting in infancy gives lasting literacy boost. Retrieved February 25, 2018.
