故事開始於一個普通的黃昏，我正在廚房忙於處理食材，平時阿女都是在客廳自個兒玩耍的，突然她探頭問：「媽媽…⋯我想你陪我。」我無意一句：「乖，自己玩一陣先，等媽媽煮好飯再陪你。」
阿女退出廚房，隔了一會，異常寧靜……
在我的經驗，只有兩個可能性：第一，佢訓著咗；第二，佢喺客廳闖禍，例如將所有玩具在玩具櫃倒出來又或是將泥膠散落在屋企每一角落。
正準備出去揭曉答案時，眼前景象令我呆了一呆。
▌哭泣的小人兒
阿女捲縮在飯廳一角，手在畫圖畫，而我眼角直接掃射到圖畫中的一個小人兒，一個正在哭泣的小人兒。
我立即轉身行番入廚房，放下鑊鏟，熄火。
「呢個小朋友做咩喊呀？」我嘗試向女兒探個究竟。
「小朋友喺屋企裡面，道門鎖住咗，媽媽煮緊飯，朋友仔喺出面，佢一個人喺屋企出唔到去玩呀！」阿女說畢，大哭起來。
聽到此處，心中不禁疑問起來，是不是阿女在學校發生了什麼問題？難道是交不到朋友嗎？
但這些問號都暫且放下，先處理阿女的情緒要緊。猶記得醫生老闆說過，即使是小朋友六歲前的陰影創傷，也可以影響日後長大的心理。
▌打開那扇心門
我嘗試執起阿女的畫筆，想藉圖畫和她對話，想來想去，一時間不知要從何許人的角色出發。心中靈光一閃，想起阿女近日從學校認識到的「全能天父」，決定借助祂的力量。
我拿起畫筆：「天父在天空上面，見到呢個小朋友喊緊。於是天父輕輕一吹，將呢度鎖上的門，給吹開了…⋯」
阿女眼淚漸漸止住，眼神露出了期盼。我不敢怠慢，用我僅餘的小學雞畫功繼續「拆彈」。
我一邊畫一邊講：「小朋友終於跑出去，佢地一家人開開心心攬埋一齊。」然後我讓她將小朋友畫在父母中間，讓一家三口快快樂樂團聚。
阿女畫完後，坐在沙發，一邊攬著畫作，一邊大哭不止。
當她冷靜下來，我問她：「係咪今日喺學校發生唔開心的事？」
阿女搖頭。
「咁你係唔係覺得媽媽唔陪你，所以你唔開心？」
「係。」一個簡單而直接的答案。
▌煮飯事小，陪玩事大
就是因為這麼一件小事嗎？
後來不禁回想，細個時，時不時都遇到自己一個人玩的時候，相信亦說過無數咁多次「媽媽，我想你陪我」的說話。可是，患上「煮飯煩躁症」媽媽總會雙手一揮：「出去！出去！你自己玩啦，媽媽要煮飯呀！」
盡責的母親要為一家的肚子著想，換來我每次都被拒之門外。我有沒有因而不開心呢？說真的，一點點還是有的，最起碼事隔多年，我仍然記得那道緊閉的廚房門、那張生氣的臉，和那個像武器的鑊鏟。
如今事情發生在我倆母女身上，無心一句引發小風波，為了不要讓「煮飯焦躁症候群」再蔓延落去，我果斷地放下鑊鏟，花少少時間，坐下陪伴傾談。
是的，這頓飯沒有如期完成，使一家人吃飯時間延遲了。但意外地，我得到了一個令兩母女更親近的心靈接觸。
圖片來源：Pixabay
