POPA i'm
530 views

【POPAi'm – 那一天,我兒在名校PN班退學了】 # 87 雙職樹熊媽

Sep 22, 2017

雙職樹熊媽 (仔,2歲半)

 

「呢個故事分享出來,可能有啲人會覺得匪夷所思,因為我曾經幫我兩歲嘅仔仔退學,仲要係一間人人稱羨嘅區內名校PN班。當時一心諗住想小朋友早啲適應K1才報PN班,也沒想過能一擊即中,而且可以直上到K3,未來幾年一勞永逸,只是,原來看似幸運的美好事,也可以發展不似預期……

 

由讀PN班第一日開始,佢一見到校服就耍手擰頭叫『唔要啊唔要啊』;平時搭巴士超興奮,返學搭巴士就唔出聲;日日喊足一個鐘,即使老師用佢最愛——強勁嘅車仔團隊迎接佢,依然搵腳鉗到孭帶實一實,死都唔肯入校門。到放學喇,就九秒九衝走;回家問佢『返學好玩嘛』,佢就低頭唔出聲,或者答:『唔想講呀媽咪』…見到佢喺學校嘅表現同平時係幾唔同,直頭好似變咗第二個人咁,做媽媽,絕對會知道佢有幾唔開心,當下眼淚不只在心裡流,也在眼眶滾。

 

每次看他哭著進校門,我都會問自己:『我俾佢返PN,到底係唔係啱嘅決定?』

 

也曾想過『不如再試下先,可能慢慢會適應到呢』,可是後來發生的一件事終於我鐵下心腸。一天,他放學後發高燒,原來是染上肺炎,足足住了一個禮拜醫院,加埋其他斷斷續續的小病,第一學期三個月佢成日都要請病假,計埋得三十日係返到學。見到佢一返咗PN班後就病到七彩,小小的身軀捱著病魔的侵襲,最後我選擇了退學。

 

『名校黎架喎,走咗無架喇喎,好多人想入都入唔到。』

『咁細個人仔,未慣嘅啫!』

『唔讀第日邊跟得上啊!』

『接觸多啲小朋友對佢成長好啲,仲可以train自理能力呢!』

『返學係咁架啦,遲啲返咪又係會病……』

 

這些我和丈夫通通都知道,也絕對擔心搵唔返好學校,又驚佢無同同輩玩嘅經驗,上到K1點算。

 

但我哋只能夠為小朋友做當下最適宜嘅決定,我哋唔希望咁細個人仔,每日都經歷傷心失意。一日係咁、兩日係咁,直到三個月過去都全無好轉,好擔心唔知有啲咩事,要我坐視不理,實在做唔出,無奈下只好忍痛做決定。咁大人返工唔開心,都想辭職搵過第二份啦,但小朋友無得為自己揸主意,我哋就要幫佢搵第二條路行!

 

我開始問,PN班到底是否必要?如果只係為咗幫佢做好升讀K1嘅心理準備,有無其他更適合嘅方法?我同丈夫絞盡腦汁,最後決定根據仔仔嘅興趣,帶佢參加以音樂跳舞為主嘅playgroup,等佢習慣下同老師同學仔相處;又會喺講故事同role play加入幼稚園元素,令佢對校園有美好啲嘅想像;入學前帶佢去幼稚園附近行下,熟習下,又向佢強調呢個係新環境,『同以前唔同架』,幫佢洗走陰影。

 

而家仔仔已經K1開咗學幾個禮拜,但係神奇地,爆喊嘅情況一次都冇發生過,而且一日比一日開心同精靈,唔只肥返,仲多嘢講左。不過你問我,我都唔清楚係因為佢已經大個咗啲、適應力強咗,定係我哋嘅努力發揮作用。但我可以肯定嘅係,當初退學確實係一個啱嘅決定。

 

邊個話路只得一條?」

 

圖片由受訪者提供

Keywords
yes