【動畫】兄弟姊妹愛吵架｜仔女日日嘈，家長要點做？
為何兄弟姊妹總愛吵架？有人覺得生一個就夠晒數，有人就想生多個，當屋企有兩個或更多小朋友，父母都希望見到佢地相親相愛，但現實生活中，小朋友最鐘意咩都拗一餐，初則口角，繼而驚動父母。你想盡辦法希望佢地少啲嘈交，連玩具都買兩份，諗住佢地唔洗爭，但有學者竟然話唔比佢地拗，竟然會影響佢地嘅成長！？
愛吵架不代表關係差
呢位學者就係伊利諾伊大學心理學教授Laurie Kramer，佢指出與其著眼於減少兄弟姊妹之間嘅爭吵呢類負面互動，父母更應該留意佢地有冇正面嘅互動，即係哥哥有無主動叫細佬一齊玩？又或者玩遊戲嗰陣佢地有無主動同一組？因為手足間的正負面互動交替頻率，同佢地關係嘅親密程度係成正比。
換言之，拗交拗得多都唔表示佢地關係一定唔好架！最緊要係佢地會friend番！當正面同負面嘅互動交替，先可以令佢地共同成長得更快。如果父母完全唔想兄弟姊妹間有任何衝突，甚至一發生就插手干預，反而無助佢地建立親密關係！
諗深一層，老公老婆幾恩愛都會有時拗下交，咁先有情趣㗎嘛！所以與其「斬腳趾避沙蟲」，唔畀小朋友嘈，不如趁機教小朋友點樣處理衝突。
學會處理衝突
其實係心理學上「衝突」有分破壞性衝突和建設性衝突。破壞性衝突泛指對雙方對人唔對事，或者最後無解決到嘅衝突，即係拗咗一場交，但係根本無討論過個問題所在。而建設性衝突就係對事唔對人嘅衝突，雙方雖然目標、想法不一致，但最後經過討論達到共識。
手足間嘅建設性衝突可以幫助小朋友較早明白每個人嘅性格都不同，想法都不一定一樣，最重要係同其他人尋找共同相處的方式，而佢地嘅社交，情感及與人相處的認知都會大大提升！不過，加拿大心理學家Michael Ross指出，原來2歲至7歲的兄弟姊妹有八成以上嘅衝突都係破壞性，只有大約一成係可以達至相互妥協的建設性衝突。
把破壞性衝突轉化成建設性衝突
所以專家建議家長可以做嘅係將破壞性衝突轉化成建設性衝突。偏偏好多時家長見到小朋友拗交，第一個反應就係叫佢地唔好再拗，小朋友唔聽，連自己都可能忍唔住加入戰團。如果佢地無再拗落去，好多父母就會自恃成功，以為一天都光晒。其實咁做反而令小朋友嘅拗交風波以破壞性衝突結束。咁同佢講道理又得唔得呢？大家都可以想像，喺小朋友拗交拗到面紅耳赤時，你去同佢講道理﹖破壞力有機會勁過破壞性衝突！
Michael Ross就建議家長同小朋友做賽後檢討。即係當小孩衝突結束後，父母先至出場，亦唔好諗住鬆口氣就算，而係要記低佢地為乜拗交，等佢地全完冷靜落黎之後，同佢地一齊傾。研究顯示，賽後檢討策略，可以令建設性衝突出現嘅頻率由9-12%升至65%！
老實講，喺咁多種親人關係中，手足先係最長久嘅關係。我地無法次次都為佢地調停、判對錯，所以把握細個時嘅拗交機會，教會佢地處理衝突，係父母俾手足最好嘅禮物。
參考資料
- Stepp, G. (2011). Brothers and Sisters, Unite! Retrieved from VISION
- Kramer L. The Essential Ingredients of Successful Sibling Relationships: An Emerging Framework for Advancing Theory and Practice. Child Development Perspectives. 2010; 4(2): 80-86.
- White L. Sibling Relationship Over the Life Course: A Panel Analysis. 2001;63:555-568.
- Ross H, Ross M, Stein N, Trabasso T. How siblings resolve their conflicts: the importance of first offers, planning,and limited opposition. Child Dev. 2006;77(6):1730-45.
- Gass K, Jenkins J, Dunn J. Are sibling relationships protective? A longitudinal study. J Child Psychol Psychiatry. 2007;48(2):167-75.
圖片來源：Pexels
