童話故事有教化作用？　研究：由「人」做主角更易代入

家長有冇諗過發揮創意，將「龜兔賽跑」嘅龜變成自己，兔仔就變做小朋友；「三隻小豬」又可以變成家中三兄弟﹖原來咁樣，竟然有可能令小朋友更加明白故事中嘅教訓﹖

加拿大多倫多大學一個研究發現，當故事角色係擬人化嘅豬牛羊時，小朋友可能會認為自己同呢啲動物無乜相似嘅地方，因而代入唔到，於是無咁容易get到入面嘅做人道理，並將道理應用到自己待人接物上。相反，如果係用人類做藍本嘅故事，小朋友就會易啲吸收，就好似參加研究嘅孩子聽完以「人」為主角嘅故事後，更明白故事中關於分享嘅道理，而且真係更加願意分享。