#137　菠蘿包mami　（兒子，7歲）

「明明是在探討生死大問，阿仔卻說：『媽咪，我真係好鍾意玩呀！我唔想咁快死，好多嘢未玩過！』

我聽到呢句，都唔知好嬲定好笑，人仔細細，只有七歲，咁快就諗死。但因為鍾意玩，鍾意到找到人生樂趣，又確實幾好笑！

但係，現今做小朋友的，真係有咁多時間去玩嗎？放學回家還要OT做功課，莫講其他興趣班和補習班。而且，呢啲興趣雞精班，都唔係真係出於興趣，而係我哋家長希望小朋友快人一步吸收知識先去報名。一個幾歲嘅人仔，從來無話想去學。他們心裏面只想玩、玩、再玩，直至無電！

玩，永遠不是排第一

聽到呢個玩字，我哋可能會話『玩？邊有時間呀，讀多啲書好過啦！讀好書、上大學、找份好工，結婚生仔買樓都有多啲錢嘛！』

唔通人生只係得一條直路？只要跟住行，就一定成功？走彎路，甚至行了冤枉路就代表失敗嗎？路途中，玩下、欣賞下風景真係有問題嗎？

我為何有這個疑問呢？問問自己，原來自己當初就係行直路嘅人！

從小，我看著爸媽拼命工作，擔起一家大細的生活，所以在我眼裏，努力讀書、上大學、找份好工是我唯一一條路。玩？沒有時間，也沒有錢。放學回家就好似隻小蜜蜂咁，勤力做功課溫書。因此，換來也算不俗的小學成績！

就是因為有不錯成績，呢條直路就一直行下行下，上埋大學，亦不難找份工作，日日拼命三郎咁努力工作，工時更達朝九晚九。好多年，都過著一板一眼的生活——放工便回家休息，偶爾便約下朋友聚一聚。

長大後才發覺缺少樂趣

當時不覺得有問題，因為個個人都係咁㗎啦，我仲已經算係好好——有份工，養到自己，又俾到家用，要感恩的！但係唔知點解，內心總是有點空洞。經過長年累月的洗禮，發現呢份苦悶，可能係來自自己很少盡情地玩、做自己喜歡的事，也甚少培養興趣。

可能受兒時經歷影響，到現在做了媽媽，我只要求阿仔做完功課後可自由活動，平日間中亦會帶他去公園踏單車、跑下步，禮拜六日亦會安排一家去郊外野餐，呼吸新鮮空氣。

雖然這種玩樂為先的安排，令阿仔的成績確實比其他小朋友稍遜，但我深信童年應該是玩樂與讀書並存的，人生並非只有學習而沒有放鬆自由的時間。

而兒子亦知道做完功課、溫完默書，便可以大玩特玩。因此為咗多啲時間玩，又可以同屋企人或者朋友出街，他每日會盡快完成。當然佢偶爾也會hea做，但至少佢都叫有動力去做！呢股想玩嘅欲望，可以成為好多嘢嘅動力，真係好過你同佢講幾多人生大道理！

『玩』，其實唔係真係咁奢侈，有時可以係學習的動力！」

圖片來源：unsplash