「媽媽，我唔想要自己個名呀！」阿女皺晒眉。
「點解呢？」
「因為我唔鍾意個『朱』字呀！」
「噢……」
讀者們，相信大家都知道我的「噢」所為何事了吧！
▌你個名好好笑
係喇，無錯喇，細個嗰陣，總有啲同學仔至鍾意同人改花名，叫阿明一定要加條蛇，叫阿蓮例牌一定要佢去賣菠菜，咁姓朱呢？當老師點名，講到個「朱」字，同學仔又起哄：「哎喲，豬呀！哈哈哈……」
你哋係咪都試過被人笑，又或者做過笑人嗰個呢？
當初嫁人，愛郎姓朱，懷上孩兒，諗改名已經被人開玩笑：「哎，叫朱腸粉囉！」「呀，不如叫朱仔包呀！」「呀，都係叫朱錦春！」
講真，我面都黑，幽默同低俗一線之差而已。學Peppa話齋：「一啲都唔好笑！」
來到今天，阿女投訴自己個名，那當然不能敷衍了事。
▌我喜歡我
我：「做咩呀？學校有人笑你呀？」
女：「佢地笑我話係豬呀，全部人都喺度笑！」
我認真的說：「女，你鍾唔鍾意自己？」阿女點頭。
「咁你知唔知姓名就代表你自己，你的名字很有意思，是一件堅固的盔甲，在河流中保護住你，等你有任何困難，都可以一直守護你呀～所以你話喇，個名勁唔勁先？」
隊友在旁做了個「勁」的口形，繼而幫手助攻：「喂，阿女，你知唔知爸爸細個都成日被人笑個『朱』字？起初爸爸都會唔開心，不過爸爸諗到一個方法，我大聲咁講俾同學知，名字係爸爸媽媽送俾我的第一份禮物，有好多愛喺裡面㗎！同學仔聽完之後，靜靜雞同我講對唔住，爸爸原諒咗佢，仲成為好朋友呀！所以，不可以隨便笑人家的名字呀，知唔知？」
阿女爽快說句「知道，我以後一定唔會笑人地個名，太曵啦！」又蹦蹦跳跳去玩，我轉頭問隊友：「你嗰時真係咁講咩？」
隊友：「梗係唔係啦，小學嗰陣被人笑到面黃，因為個『朱』字喊過N次添啦，我講呢個故事比阿女聽，無非都係想佢知道爸爸都經歷過，都會唔開心，但最緊要讓佢明白凡事用正面態度面對，就會得到相應的結果！」
▌從傷害中學習到的事
雖說如此，小朋友如白紙般，怎輕易懂得自我排解內心情感？這次事件中，投訴不喜歡自己的名字是女兒唯一想到的方法，究竟我們兩公婆解說後，女兒是否已完全釋懷？只有天知道。
但肯定的是，女兒被取笑時的感受，她親身領會過，學懂了同理心。在漫長的人生中，我們無法迴避所有傷害，但我希望她至少不會做傷害別人的那個人。我相信她會一步一步強大起來，面對挑戰，終有一天，能自豪地說：「我的名字有個朱字！」
