2022 年話咁快就過咗一半，唔知大家呢半年過得如何？有無發現小朋友同半年前又大個咗好多？
半年於我哋大人好似無咩特別，30 歲到 30 歲半咪又係一樣，但 3 歲到 3 歲半，卻可以有天大嘅唔同。總係要時間夠長，我哋先會有感覺。
一年？兩年？定係七年？
7️⃣年夠一個 BB 由受孕到出生，到升小——孭起書包吸取知識不用愁～對父母而言都係另一個階段嘅開始！
POPA 都喺今年踏入咗第七年，亦都係我呢位編輯喺呢間公司嘅第七個年頭，我稱之為：七年之「養」，教養個「養」。不過今日嘅分享未必好關教養事，但如果你有興趣了解多啲 POPA，歡迎大家睇落去～
其實行文之際係六年零八個月。可以喺一間公司度做咗六年零八個月，而且大部分時間都係做得開心滿足，都幾難得。
🌟 仲記得當初入呢間公司嗰陣，從紙媒轉到網上媒體，由寫文化副刊變成寫親子同心理學呢啲科普野，好多野都好新鮮。
我係公司第一位全職員工。老細到今日都仲會多謝我當日咁勇，走入一間超蚊型公司做開荒牛。而其實佢唔知道，我好鍾意做細公司，因為同事間嘅氛圍通常都好好。（不過，我都係做到第二年先至有另一位全職同事🙈期待佢之後都會迎接七年之「養」！）
🌟 而呢六年幾以嚟，其中一個最大嘅得著就係，結識咗好多人，有家長，亦有做家長教育嘅人。
當大家成日話呢個社會個個都好功利，或者有好多「要考牌」嘅父母，我哋接觸到嘅反而大部份都係出心出力有理念嘅人，大家都貢獻緊自己嘅所知所學；亦有一班父母未必有專業背景，但會花好多時間去學習同省思，又願意向大眾 share 自己嘅掙扎、困惑同領悟，讓更多父母都可以搵到教養路上嗰份辛酸嘅共鳴，又或者觀照自身。有啲相識得比較耐嘅，我哋甚至可以話係睇住佢哋嘅小朋友大！
仲有好多好玄妙嘅緣份，例如因為《三人行》一首兒歌令我哋有機會同英文原曲創作人Video call；亦有投稿者喺幾年之後，成為咗我哋同事！
🌟 另一個得著，就係同大家一齊學識咗好多 Child development 嘅知識，咁多年睇埋睇埋嘅研究 Paper 比以往讀大學時還要多，有時都真係幾攰，但越學習，越發現到自己有更多需要學習嘅地方。
喺度仲要多謝公司畀我哋有買書 Allowance，令我哋可以 keep 住睇書嘅習慣～有 Input 先有 Output 架嘛～ ps. 其實公司仲有一啲奇怪嘅福利，有機會再同大家分享～
🌟 七年嚟嘅感受仲有好多，但一路寫其實都會諗，到底讀者想唔想知我哋團隊背後嘅故事架？或者大家會否好奇到底 POPA 嘅內容係點做出嚟？下次編輯話再同大家分享！
