睡眠作息亂拖垮小朋友專注力？4大原則拆解惡性循環

養育孩子，總會遇上好多雞先定雞蛋先嘅迷思。今日大家分享其中一個——可能大家都知，小朋友唔夠瞓專注力會低啲，但係會唔會其實正因為專注力低、坐唔定令到小朋友難以入睡？

睡眠作息亂VS 專注力差，雞先定蛋先？

最新一個本地學者發表嘅研究指出：雞先定雞蛋先？唔使揀，因為呢個係一個循環嚟！

研究分析咗超過 15,000名小朋友，由5歲跟到11歲，結果發現：如果小朋友瞓覺時間唔規律，之後專注力問題會多啲；而如果本身比較好動、難專心，又會更加難建立穩定睡眠。

即係話，呢件事係一個loop：
瞓得亂 → 坐唔定．坐唔定 → 更難瞓

都是前額葉惹的禍？

點解會咁？人類大腦入面有一個重要區域，叫前額葉。呢個部分主要負責控制衝動、保持專注、計劃事情、調節情緒等等。而前額葉對睡眠非常敏感，一旦睡眠唔穩定，大腦嘅生理時鐘會被打亂，前額葉嘅運作亦會變得冇咁有效率。結果就可能出現容易分心、坐唔定、情緒較波動等情況。

研究同時發現，如果小朋友本身比較活躍或者衝動，佢哋夜晚亦可能更難入眠。例如上床後碌嚟碌去、不停講嘢，好難靜落嚟，又或者想再玩一陣。結果自然更難形成穩定嘅睡眠習慣。

於是，循環就咁開始。

你可能會話鬼唔知阿媽係女人咩，大家更關心嘅可能係咁可以點打破循環。幫助小朋友建立穩定的睡眠規律？

家長不能不知的4大原則

最後同大家分享幾個研究同兒童睡眠專家經常建議嘅簡單原則：

首先，固定睡覺時間。

最好每日差不多時間上床，包括週末！因為人體其實有一個生理時鐘，規律嘅時間會令身體自然產生睡意。

之前我們就分享過一篇Penn State的研究，指出就寢時間的規律性比睡眠時數或品質，更加影響孩子的情緒！孩子每晚就寢時間變化越大，他們在行為和情緒調節方面的表現就越差。舉例來說，在該研究的一星期內，就寢時間平均只相差約 20 分鐘的孩子，通常比每晚就寢時間可相差達兩小時的孩子，更能自我調節。

第二，建立睡前儀式。

睡眠儀式包括沖涼、讀故事、關燈。固定流程會令大腦知道：「依家係時候瞓覺啦。」如果孩子還是很抗拒，我們不妨多觀察和聆聽孩子心聲。

我們的導師Sunny就曾分享他兒子年幼時也很抗拒刷牙瞓覺，抽絲剝繭才發現，那是因為他每天跟媽媽相處的時間還不夠，而隔天醒來媽媽就已經出門上班了，所以瞓覺意味著和媽媽分離。後來，Sunny為孩子建立一家人一起睡前說故事和聊天的「儀式」，情況慢慢改善過來。

第三，睡前減少電子產品。

手機、平板同電視發出嘅藍光會抑制褪黑激素，令入睡變得更困難。Harvard Medical School更建議睡前兩至三小時避免使用屏幕。這可不光是對孩子們說的，也包括我們自己。想要好一點的睡眠質素，請減少使用電子產品。

最後一點是大家唔需要追求完美，同埋唔能夠急進，諗住一步解決孩子的睡眠問題，我們可以聚焦一小步的進展，只要開始穩定少少，個循環就有機會被打破！

圖片來源：Pexels