宣稱有助腦力開發嘅DVD教材喺全球各地都大賣，因為好多家長都相信，俾BB睇多啲，學講嘢都會快啲。但原來呢個方法會令BB嘅語言能力不進反退？
早喺2007年，權威期刊《兒科醫學》刊登咗一篇華盛頓大學嘅研究，指出睇過呢啲DVD嘅BB，所學到嘅詞語數量反而比冇睇過嘅BB少好多；而觀看時數愈多，語言能力會愈差。
到底點解？《Nurture Shock》一書引述證據，指出其中一個原因係當BB學講嘢時，會望住說話者嘅口部動作。當嘴型配合說話聲，意味BB嘅視覺同聽覺同時接收緊訊息，專注力會提高，吸收到嘅野會更多。不過呢啲DVD入面，除咗唔會有活生生嘅人樣，亦有太多同畫面唔相關嘅旁白，而畫面同旁白都競爭緊BB嘅注意力，於是對佢地嚟講，睇DVD就同聽住一堆噪音冇太大分別。
其實想令小朋友有更好嘅語言能力，家長多啲同小朋友面對面傾偈反而更加有用！
資料來源
Bronson, P., & Merryman, A. (2011). Nurtureshock. London: Ebury.
Bronson, P., & Merryman, A. (2011). Nurtureshock. London: Ebury.
圖片來源：Pixabay
