30, 29, 28, 27……
「唉，仲差少少……」陳師奶望住正在進入倒數嘅計時器，不禁嘆咗口氣。仲差不到三十秒，阿囡就成就解鎖，成功坐低睇書十分鐘，偏偏……
跟好多父母一樣，陳師奶對於小朋友嘅專注力問題感到十分困擾，佢網上搜尋過好多方法但都未能燃起阿囡嘅學習興趣。
「點算呢？咦，等等……」大概面書大神都感覺到陳師奶嘅憂慮氣場，畀佢發現到——香港公共圖書館嘅網上互動學習平台Miss Humblebee’s Academy。
有咩可以學？呢個平台嘅主要對象為學前兒童，內容包括藝術與音樂、語文與讀寫、數學、科學與社會學，以及社交情感學習等五大範疇，小朋友可以按興趣同程度選擇喜愛嘅內容。而每當完成一個項目，仲可以獲取虛擬金幣、拼圖同貼紙，換取網上小遊戲或其他獎勵，大大提升投入感同學習動機！
FunPark童書夢工廠
但正所謂花心始終係太太們嘅天性，明顯一個英語平台並不能滿足鍾意多選擇嘅陳師奶。好在除咗英語學習資源，公共圖書館仲提供一系列適合3-12歲學童嘅繁體中文電子書。FunPark童書夢工廠內容就涵蓋詩詞、數學邏輯、品德教育等等。
陳師奶大仔就私心偏愛《達克比辦案》系列，全套以漫畫形式連載，生動惹笑之餘，仲學到唔少關於昆蟲同動物嘅冷知識。例如有邊種蟲係吃糞長大？又好似負鼠係自然界中出晒名嘅扮死能手，你又知唔知？莫講話小朋友，就連大人都睇得津津有味！
「媽咪，我要睇呢本有得意動物嘅！」陳師奶睇得入神，連阿囡被吸引咗過嚟都無發現。難得佢主動要求，做阿媽嘅當然唔敢怠慢。有幸被阿囡選中嘅呢本《最棒的禮物》唔單止色彩豐富，仲有唔少隱藏小細節，小朋友喺學習數字同顏色之餘，仲可以考埋眼力，同爸爸媽媽一齊發掘書中彩蛋添！
「媽咪，你睇！啲公仔會郁㗎，㩒落去仲有聲添！」無睇錯呀，全部動畫故事均以普通話朗讀，仲有背景音效，加埋互動練習同小遊戲，難怪小朋友都愛不釋手。
多個精彩課題 激發自主學習
望住自發坐定定睇書嘅阿囡，陳師奶已講唔出有幾咁感動，佢按下快門，將呢個寶貴時刻放到網上開心share。未幾，唔少媽媽朋友都表示好有興趣，仲問有冇畀年紀大啲小朋友嘅學習平台添。
「你哋問啱人啦！好似Gale in Context: Elementary就有唔少適合4-11歲小朋友嘅英文學習資源，藝術、人文、體育、科學等等嘅課題應有盡有。唔止呀，佢仲有兒童雜誌、新聞、人物傳記、圖片同教育影片。如果初學者想學英文，仲可以開埋個朗讀功能邊聽邊學，夠晒貼心❤️」陳師奶以指尖輕輕按出「傳送」，另一邊廂已經聽到阿仔阿囡興奮歡呼。
「媽咪，哥哥話知道嚟緊旅行，屋企兩隻蝸牛仔可以點處理啦！」阿囡指住屏幕上一條名為 “Can I go away on vacation and leave my worms alone?”嘅教育影片，向媽咪宣佈呢個開心大發現。不過對於陳師奶嚟講，最開心係見到啲仔女咁主動去搵答案，所以幾時都話自主學習從來係最好。
睇到呢度，係咪好想知點樣先可以用到呢啲網上資源呢？只要你係公共圖書館嘅登記讀者，無需額外申請就自動享有網上帳戶，以圖書證或身份證號碼及密碼登入，即可免費使用電子資源。如忘記密碼，可按指示以登記電郵地址重設密碼，或到就近圖書館辦理。
除咗以上介紹嘅兒童學習平台，陳師奶見到公共圖書館仲有多個電子書館藏同電子資料庫，由理財、烹飪到近年大熱嘅斷捨離題材都有，嚟緊一於趁me time睇下啲休閒同實用資訊，兼且同小朋友齊齊享受親子共讀，網上學習嘅樂趣～
想了解公共圖書館電子資源，可以瀏覽「喜閱．飛越」網頁。唔想睇字，咁就睇片了解下喇：
