年輕時中途放棄運動，或影響成年後的心理健康？

唔知你哋有無試過，細個嗰陣，曾經都有自己好鍾意、好有熱誠嘅興趣運動，充滿衝勁想堅持落去，但最後因為種種原因而中途放棄咗。多年之後，每次諗返起，都會覺得好惋惜，甚至好希望當年自己可以堅持多一陣？

呢個就係我嘅故事。

「被半途而廢」的孩子

中學時我成功入咗排球校隊，本來好開心。但因為成績問題，被父母同老師勸退。嗰時年紀咁細，又邊拗得過大人，結果唯有退出球隊。自此之後，我再無掂過排球。一路以嚟我心入面都仍舊有點不甘心，後悔當年點解無堅持下去，無機會完成自己參加校際比賽嘅夢想。

我知道我一定唔會唯一一個「被半途而廢」嘅小朋友。只係父母可能無諗到，竟然有研究顯示，孩子如果放棄咗自己有興趣嘅體育運動，長遠對佢哋成長後嘅情緒發展，真係會帶來負面影響。

從未擁有總好過中途放棄

Ohio State University同Baylor University最新一項研究發現，青春期時期持續參與校隊或體育活動嘅小朋友，成年後出現焦慮同抑鬱症狀嘅風險明顯較低。最出人意表嘅係：中途退出球隊嘅人，心理健康狀況竟然比從未參加過運動嘅人更差！

換句話講，本來無一物，原來好過曾經擁有但最終放棄。

研究團隊分析咗近 4,000 名美國成年人嘅數據，了解佢哋喺中學時期有無參與運動，以及依家嘅心理健康狀況。結果顯示：

．從未參加過運動：心理健康屬中等水平；

．中途退出運動者：焦慮同抑鬱症狀最高；

．一直堅持運動至 18 歲或以上嘅人：心理健康最佳。

不過就算無睇到呢個研究，因為自己嘅經歷，我仍深信能夠有樣學業以外嘅嘢，畀佢哋專心投入、盡情揮灑汗水，無論結果點，都會係一件好事。所以對於小朋友鍾意嘅興趣或者運動，力所能及，我都會盡力支持。見到佢哋玩得開心、笑得燦爛，已經係我作為父母最大嘅滿足。

圖片來源：Pexels