從運動員的心理質素看教養：Grit

奧運狂熱，相信大家睇到熱血沸騰，見到有人討論一位成功運動員到底係如何煉成～家境資源？天分？努力？唔知你哋點睇？

成功運動員到底係如何煉成？

我哋就覺得父母點培育，都係重中之中。睇住香港運動員超強嘅心理質素——無論係沉得住氣逆轉勝嘅張家朗同江旻憓，定係面對出局都能夠好好享受比賽嘅陳諾思同石偉雄等，唔知作為家長嘅你，會唔會都想知咁到底要點樣先可以培養到孩子不輕言放棄，同時能大方接受成敗？

今日同大家分享一個好重要嘅概念：“Grit”。

Grit這種心理質素

美國賓夕法尼亞大學心理學家Angela Duckworth認為，Grit就係毅力與熱誠的結合。一個有Grit嘅人擁有無比毅力與韌力，即使被擊倒，佢都會爬返起身再接再勵，而喺當中「努力」呢個元素相當重要。一個人如果只有天分，從來無努力，就無法將天分轉化成技能，當擁有咗技能，都仍然要努力先可以成功。

不過單單有毅力，其實同死捱其實無太大分別。真正gritty嘅人通常滿腔熱誠，即使眼前事物好繁瑣好悶，甚至偶爾會令佢哋沮喪同痛苦，佢哋依然會搵到當中意義，心中嗰一團火唔會熄 。所以，係咪享受自己做緊嘅事，對嗰樣事物有無興趣亦可以話係Grit嘅種子。

父母可以如何培養孩子的Grit？

Duckworth建議，父母首先要把孩子的興趣放在第一位，因為熱情係堅持下去的燃料。不過大家唔需要太心急，覺得要好早就搵到呢個「興趣」，因為就算係我哋嘅奧運冠軍選手張家朗同江旻憓，都係高小嗰陣先開始接觸劍撃。我哋不妨可以細心觀察下，小朋友平時對咩野最好奇？有咩會令佢好入迷？喺年紀仲細嘅時候，畀佢多啲接觸唔同嘅嘢，更重要嘅係，多啲傾聽孩子的需求，給予支持和鼓勵，咁樣就算唔洗我地問，孩子的興趣都會慢慢浮現出嚟。

走向成功的道路很漫長，有天分、有資源嘅人或者真係會贏在起跑線，但我哋相信，只有嗰啲願意持續努力同付出嘅人，先可以笑到最後～

圖片來源：Pexels