大家心目中的好爸爸係點樣？
一聽到傳統男性形象嘅爸爸，即刻聯想到嚴父、硬漢、大男人主義……似乎唔符合而家對好爸爸嘅標準。但原來，佢哋極有做好爸爸嘅潛質！
傳統男性特質＋育兒＝？
《男性與男子氣概的心理學期刊》（Psychology of Men & Masculinities）日前刊登一則研究，參與其中的男士要在伴侶懷孕時接受問卷調查。
問卷圍繞住多個傳統刻板男性特質，包括競爭性（competitive）、大膽（daring）、冒險精神（adventurous）、強勢主導（dominant）、侵略性（aggressive）、勇敢（courageous）、承受壓力（stands up to pressure），男士們需要為自己俾分，睇下自己有幾大程度符合呢啲特質。
同時，問卷都會量度埋男士們作為爸爸嘅育兒信念，例如佢哋需要回答自己有幾同意「男人應該要分擔照顧小朋友的工作，例如沖涼、餵食同換衫」呢啲講法。
在孩子出生9個月後，研究員會觀察爸爸們與小朋友的互動，進而就住爸爸嘅正向育兒行為，以及與太太合作撫育小朋友表現有幾好等範疇評分。
愈似真男人，就愈可能係好爸爸？
相信自己應該高度參與育兒的爸爸們，當然係拎到高分啦，研究員都話唔出奇。但令研究員估唔到嘅係，呢班爸爸當中，愈符合刻板「真男人」形象的，就愈大可能表現出良好的育兒行為。
研究員推斷，可能是因為這些爸爸在工作上利用了傳統男性特質而取得成功，而將育兒也視為重要工作的爸爸們，順理成章就將這些特徵優勢都套用落育兒當中。
研究雖然只係針對高等教育同雙職家庭的爸爸，而暫未能套用喺所有爸爸身上，但研究結果依然令人鼓舞。
睇得出研究裡面嘅男士們，都摸索緊點樣成為好爸爸！而將傳統男性特質同嶄新的育兒方式結合，就係其中一個新嘗試，向蛻變成好爸爸邁進了重要嘅一步。唔知大家身邊有人無咁樣嘅好爸爸呢？
資料來源：
Ohio State University. (2021, April 9). Masculine traits linked to better parenting for some dads: Key is for men to also believe they should nurture, study finds. ScienceDaily. Retrieved December 14, 2021 from Science Daily.
圖片來源：Freepik
