看着時鐘的指針慢慢走到十一點，我拖着疲倦的身軀走進浴室。雖然已經很疲累，但這短短十五分鐘，能夠閉上眼睛，任由花灑的水沖落面上，靜靜聽住水聲，卻是整天下來難得的平靜。就好似有人輕輕把我拉回自己嘅世界。
「我今日到底做咗啲咩？」腦海閃過呢個念頭。忙忙碌碌一整天，卻數唔出自己真正完成咗啲乜。這，也許就係成為父母之後嘅縮影。
自從有咗小朋友，生活就變得好「充實」——但嗰種充實，多數係由滿滿的行程同責任堆積而成。當然，望見兒女天真嘅笑容，心入面總會湧現一份滿足；但同一時間，我又感覺自己少咗一塊，嗰塊叫做「我自己」的拼圖。
有一種孤單，叫親職孤單
日常忙碌之中，父母往往無時間照顧自己嘅需要。當心靈長期被忽略，後果就係——孤單。根據美國Ohio State University Wexner Medical Center的研究，喺呢個通訊咁發達嘅時代，縱使有好多唔同嘅溝通方式，但卻大約有三分之二（66%）嘅父母承認，「有時」甚至「經常」因為育兒責任而覺得孤立同寂寞；62% 父母覺得被責任壓得生活好累，喘口氣都難；仲有接近四成父母（38%）直言感到缺乏支持。
我相信，好多父母都有類似經歷。有啲人可能連自己嘅需要都未必察覺到，但我估更多父母其實知自己好攰，但只能夠選擇忽略。也許因為「自己」長期都唔係被放在第一位；又或者，當照顧好孩子以後，已經無餘力再照顧自己嘅心靈。
父母都需要一道隨意門
我習慣哄小朋友睡著之後才洗澡。因為對我嚟講，洗澡就好似一扇「隨意門」，帶我回到屬於自己嘅世界。閉上眼，任由流水「沖淡」父母呢個角色，提醒自己仲係「我自己」。然後，沖完涼可以做返少少關於自己、自己鍾意嘅小事，為一日劃上句號。
你呢？你嘅「隨意門」又係咩？二十四孝父母唔一定要二十四小時全神投入。每天抽返一點點時間，聽下自己心靈嘅需要，喺照顧孩子之餘，都要記得呵護自己呀。
參考資料
- Ohio State University Wexner Medical Center. (2024, April 25). Survey finds loneliness epidemic runs deep among parents. ScienceDaily.
- New survey finds loneliness epidemic runs deep among parents. (2024, April 24). Retrieved from The Ohio State University
圖片來源：Pexels
