「有仔趁嫩生！」——關於生育，女性面對嘅無形壓力總是隨年月增加。唔想做高齡產婦，你可能要迫住生；唔介意年紀大啲先諗，可能會收到身邊嘅溫馨提示：「你要唔要諗下雪卵呀？」嗰種被時間催逼住嘅感覺，女性都不陌生。
然而我哋好少聽到社會會提醒男人「要趁早生」，甚至調返轉「遲啲仲好啦」。事業穩定啲、經濟能力強啲、個人成熟啲。彷彿男人永遠有時間。
不過，科學研究並唔係咁講。
精子，原來都係男性年齡嘅一面鏡子。
年紀愈大，精子品質每況愈下
以前因爲科學技術不足，未能準確檢測出男性精子的突變率，但Wellcome Sanger Institute嘅研究團隊運用新嘅基因排序方法，得出突破性嘅結果，更獲刊登於著名科學期刊《自然》。該研究發現男性年紀愈大，精子入面出現突變嘅數量就愈多。年輕爸爸嘅精子，大約只有百分之二帶有可能引致疾病嘅基因突變；但當去到四、五十歲甚至以上，呢個比例會升到百分之三至五。
乍看之下，只係細微差距，但喺基因學角度，呢個變化足以代表下一代患病風險增加，特別是與小孩發育障礙及癌症有關。更令人驚訝嘅係，研究人員發現，部分突變有可能令造精子細胞（如spermatogonial stem cell progenitors）「更容易繁殖」，並稱之為「自私選擇」（selfish selection）。即係話，突變對下一代唔好，但對細胞本身有利，於是帶有「壞基因」嘅精子數量先會增加得咁快。
生育壓力不該一面倒
當然，風險增加都唔代表「高齡爸爸」生出嚟嘅小朋友就一定有狀況，只係科技令我哋睇得更清楚，時間係公平嘅，無論卵子定精子都會有歲月痕跡，唔好以為所有風險都係來自女性。
醫學界亦一早提倡「夫妻共同檢查」，但現實係——社會仍習慣性地把「生唔到」、「小朋友有問題」呢啲責任放喺女人身上。
呢個研究亦並非要比較邊個責任大啲，而係提醒咗我哋：生育是夫妻共同的旅程。女性喺懷孕同生育上確實要經歷更多，但男人嘅精子都會老、都會變、都有機會影響下一代健康。
生育壓力，理應由兩夫妻共同承擔；生育計劃，亦應該係兩個人一齊去規劃。
參考資料
- Neville, M.D.C., Lawson, A.R.J., Sanghvi, R. et al. Sperm sequencing reveals extensive positive selection in the male germline. Nature (2025, October 8). doi.org/10.1038/s41586-025-09448-3
- Le Page, M. (2025, October 8). Selfish sperm see older fathers pass on more disease-causing mutations. New Scientist.
圖片來源：Pexels
