去到公園攞部手機出嚟望一望，呢個時候傳嚟小朋友嘅巨肺式大叫…「爸爸，快啲陪我玩！」
喺台南嘅公園，當然只會得我哋一家人係講廣東話，所以毫無疑問一定係我三個小朋友嘅聲音…老實講，去到公園緊係想小朋友自己玩，等我可以有返少少私人時間…上吓網又好發吓白日夢都好！我左望右望身邊唔少台灣爹哋媽咪都係低住頭，全神貫注咁投入喺佢同手機之間嘅空間，心諗你哋真係幸福…
公園中的親子百態
其實喺公園入面，可以好清楚見到每一個父母同仔女嘅關係究竟係點，例如其中一位爸爸，搵佢錄旁白VO冇得彈！
「小心右邊有石頭」
「小心前面的路有點凹入去」
「小心前面有小朋友，你不要走太快」
「小心慢慢爬上去，不小心摔下來會痛痛」
如果你合埋眼細心聽呢位爸爸嘅說話，你已經知道小朋友喺度做緊啲咩。呢位爸爸一定覺得自己好勁，可以喺發生任何意外前就提醒小朋友要注意啲咩，咁小朋友就一定唔會行差踏錯…但係我覺得呢個小朋友似係呢位爸爸嘅遙控玩具多啲，仲要係聲控嘅…呢啲父母係嚴控型，你嘅一切盡在我嘅計算之中…
公園入面亦有一啲父母係社交型，一去到公園就同其他家長傾偈，一開始傾吓小朋友情況，跟住講吓去邊度玩有啲咩好玩，再傾落去……三姑六婆政治民生風花雪月無所不談。佢哋無分男女，細聲講大聲笑，小朋友去到邊當然唔知，有時候連小朋友叫佢哋，呢啲父母都可能因為太投入傾偈，而對小朋友嘅呼喚、甚至求助都完全無反應…
而公園入面最多嘅，當然係不聞不問型，呢類父母沉醉喺手機嘅溝通之中，圍繞住身邊360度五公分範圍內外有一度氣牆，一般人不能輕易進入呢個近乎冥想嘅世界，又稱「結界」…如果想搵佢，叫佢係冇用嘅，最好係傳個WhatsApp畀佢，至能夠溝通得到。
讓孩子擁有和父親的美好回憶
至於我呢，無乜型唔型，有得抖當然想抖下，但小朋友叫到：「爸爸快啲陪我玩」，我又未可以咁鐵石心腸唔理佢哋。小朋友對嗰啲個個公園一樣樣嘅罐頭遊樂設施已經失去興趣，成座滑梯變成「捉伊因」嘅場所…成個公園最鬼殺咁嘈嘅，當然就係我嗰三個小朋友嘅笑聲，同埋我嘅喘氣聲！
我嘅爸爸英年早逝，唔計打我罰我令我懷恨在心嘅事蹟，爸爸喺我僅有嘅愉快印象中，就係佢陪我喺球場踢波，都係我哋一齊玩嘅片段。當有一日我唔再喺小朋友身邊，佢哋對我呢個爸爸會有啲咩印象？終日望住部電話？成日聲控要我做乜要小心啲乜？好鍾意同其他人傾偈？定係一個成日陪自己玩好鍾意笑嘅爸爸？
你呢？你又想喺小朋友心中留下一個點嘅位置呢？
圖片來源：Pexels
