夏日炎炎易中暑！家長必學避暑全攻略

夏日炎炎，以前我哋細個食條雪條就可以消消暑，但係近幾年嘅極端天氣，真係唔係人咁品。我哋最怕係小朋友一放電就Hyper到唔識停，一方面又唔想做個乜都say no唔畀佢玩嘅家長，但又會擔心佢身體情況。今日就同各位家長分享下「身體過熱」嘅相關疾病同資訊，等大家學習如何判斷哪些情況需要馬上緊急處理。

小朋友如果長時間喺戶外活動，或者喺悶熱環境下，有機會出現熱相關疾病，主要分三個階段：

① 熱痙攣（Heat Cramps）— 最輕微

症狀包括：肌肉抽筋（多見於腳、手臂或腹部），伴隨大量出汗。呢個係身體第一個警號。

應對方法：立即帶小朋友到陰涼地方休息，補充含電解質飲品（如運動飲品）或清水，並可輕力按摩或拉伸抽筋肌肉。如抽筋超過一小時仍未好轉，應立即求醫。

② 熱衰竭（Heat Exhaustion）— 中等嚴重

症狀包括：大量出汗、皮膚冰涼濕黏及面色蒼白、心跳加速但脈搏微弱、肌肉抽筋、頭暈、噁心或嘔吐、頭痛，甚至暈厥。通常無發燒或短暫輕微發燒。
⚠️如果唔及時處理，熱衰竭可以快速惡化成中暑。

應對方法：

如小朋友仍然清醒，根據美國兒科醫學院（AAP） 及 Nemours KidsHealth 嘅建議，應立即將小朋友移入室內冷氣環境或陰涼處，讓小朋友平躺，並將雙腳略為抬高；脫去多餘衣物，用涼濕毛巾或海綿抹身，配合風扇加速散熱；並補充含電解質嘅清涼飲品（如運動飲品）。 若出現嘔吐或症狀持續超過一小時及惡化，應立即求醫。

③ 中暑（Heatstroke）— 醫療緊急狀況

症狀包括：皮膚發紅、發熱，體溫超過 40°C（104°F）。值得注意的是，逾半數中暑兒童並不出汗，反而會有機會出現神經系統症狀，包括神智不清、譫妄、抽搐，甚至昏迷，同時伴有心跳及呼吸加速。

🚨中暑係危及生命嘅緊急狀況，必須即刻召喚緊急救援（致電 999）並同時開始急救。

應對方法：

如小朋友神志不清、體溫極高，懷疑中暑，應立即致電999，同時將小朋友移至陰涼處；用布包住冰袋（切勿直接接觸皮膚，以免凍傷）敷頸部、腋下及腹股溝（大髀罅），或以涼水（非冰水）抹身降溫，持續降溫直至救援到達。切勿嘗試餵水或飲品，以免哽塞。如果小朋友因中暑嘔吐，應將其側臥防止哽塞，同時繼續進行體外降溫。

常言預防勝於治療，咁我哋又可以點預防孩子出現以上情況？

1. 盡量避免在上午 10 時至下午 4 時陽光最猛烈的時間進行劇烈戶外活動。如果無可避免，應安排足夠休息時間，並確保有陰涼位置憩息或撐傘，以免暴曬。
2. 為小朋友穿著輕薄、淺色、透氣嘅衣物，戴寬邊帽同太陽眼鏡；嬰幼兒可以用輕薄衣物及嬰兒車保護。
3. 唔好等到小朋友話口渴先補水，要定時提醒佢哋飲水。

家長們要記得唔好只顧住小朋友，自己反而忘了好好避暑呀！

圖片來源：Pexels