研究：家長教育係潛移默化，改變信念為孩子帶來正面影響

內容重點

I) 家長教育影響有多大？

II) 改變是可能的

III) 參考資料

各位POPA的讀者都知我們致力家長教育，而以下這個研究，確實令我們非常鼓舞！有咩好消息咁值得高興？睇埋落去你就知～

相信大家都知道，父母如何與孩子互動，對孩子的大腦發展有巨大影響。而芝加哥大學醫學院兒科醫生Dana Suskind並不滿足於此，她還想了解：

第一，關於在兒童發展中父母擔當什麼角色，父母知道和相信什麼？又意味著什麼？
第二，能否改變父母知道和相信的？
第三，改變後又會帶來什麼影響？

家長教育影響有多大？

為咗找出答案，Suskind同團隊喺2016至2019年，找來居於芝加哥的不同社經背景的家庭，做咗兩個實驗。

第一個實驗始於兒科診所，當新手家長喺等候室等緊BB例行檢查時，團隊揀咗部分人做受試組（treatment group），要求佢哋睇一啲短片，短片內容包括早期兒童發展、人類大腦的可塑性、改善親子互動的實用tips。至於另一啲家長就被劃分做對照組（control group），佢哋睇嘅片只係關於兒童安全，又或者完全唔洗睇片。

第二個實驗就chur好多，團隊喺雜貨店、托兒所、診所等唔同地方，招攬咗一班家長，進行維持了6個月、每月兩小時長的家訪。受試組嘅家長需要觀看介紹兒童發展的短片，然後親身示範將從影片學習到的知識應用在孩子身上，最後仲要討論返有咩反饋同目標。同樣地，呢個實驗嘅對照組雖然都有做家訪，但內容只係同兒童營養有關。

改變是可能的

實驗起初，團隊發現教育背景或社經狀況愈高嘅家長，愈能夠了解自己對孩子的影響，亦愈做得多對孩子有益的行為。

不過，一段時間後，團隊發現受試組家長嘅信念一致發生了正向變化，而且訓練愈chur，效果愈大。

當家長開始相信佢哋的投入程度於孩子成長係重要，佢哋會投放更多資源以栽培孩子發展。投資多了，收獲自然亦多了，除咗親子互動有改善，孩子的詞彙、數學與社交情感（social-emotional）能力都有提升。

簡而言之，思維同信念係成功嘅第一步。咁究竟點解要恭喜大家呢？相信follow我哋嘅你，或多或少都認同正向教養（Positive Parenting），亦正在努力讓自己可以成為一位更好的父母。藉住呢個新研究，我哋想話俾大家知，改變正在一點一滴發生，請繼續相信下去！！！同時，雖然我哋無家訪提供，但都有百幾集短片畀大家慢慢睇㗎，連結在此。