細個嘅時候，有無試過畀人笑你嘅身形？
我有！喺13歲左右開始，我就畀人叫肥E、或19號——龍珠人造人呀（無見過自己睇返漫畫）。
肥啲啲啫，好似做錯事咁，而我確實為咗呢件事唔開心咗一段時間……
原來，月巴——對自己身形嘅不滿而感到唔開心，唔單單係我遇過嘅問題。近日就有研究發現小朋友細個時嘅BMI同進入青春期時患上抑鬱症嘅風險有關連。
小時候的BMI和青春期時患上抑鬱症的風險
大家又估下，呢個研究對象小朋友幾歲？
係7歲呀，7歲好似仲好細個，但世界對身形嘅標準已悄悄咁影響緊佢哋。
這項研究是University College London領導的一項具有全國代表性的出生隊列研究，對象為 2000 年至 2002 年出生的人，涉及13,135 名參與者。
研究人員發現，小朋友7歲時嘅BMI愈高，同佢哋11歲時不滿自己嘅身形，與14歲時抑鬱症狀（包括情緒低落、缺乏快樂和注意力不集中）增加有關連；而這個關連喺女生之中比男生更為顯著！
孩子對身形的看法會影響心理健康
換言之，小朋友嘅肥瘦唔單止影響身體，仲會因為佢對身形嘅睇法而影響埋心理健康。
呢個時候我哋睇睇自己小朋友，或者都會想佢食少啲零食，做多啲運動，BMI低啲咪得。不過就好似研究嘅主要作者Emma Blundell指出，調控小朋友嘅身形固然重要，但切勿在控制體重的同時，令小朋友過份介懷自己的身形，因為小朋友不放大個人身材的心理負擔，能夠欣賞和接納自己，才是應對因社會對身形的觀點而引發的憂鬱症的良方。
阿E當然最想係個世界會改變，唔會再對人嘅身材指指點點，尤其係連小朋友都有可能面對畀人嘲諷身材，但要個世界改變談何容易呢？或者就由我哋自己開始，畀仔女明白健康就好，身材有時只係健康嘅副產品。
參考資料
University College London. (2023, December 13). Body dissatisfaction linked with depression risk in children. ScienceDaily. Retrieved February 25, 2024
圖片來源：Pexels
