#209 小柔（14歲）
人人期待嘅《玩轉腦朋友2》（Inside Out 2）上咗畫之後，唔少平台、專家都有分享套戲點樣準確描寫到孩子進入青春期嘅變化，就連學校都問我哋嚟緊搞講座可唔可以用佢嚟做切入，梗係可以啦！不過我哋希望除咗專家、大人講之外，更可以有孩子最真實嘅聲音，所以特別邀請咗一位編輯認識多年（即係睇住佢大）嘅年輕人小柔（化名）親自寫篇文章，分享佢睇完套戲嘅感受：
年輕人心聲：我也試過討好別人
「睇完《玩轉腦朋友2》（Inside Out 2） 之後，我嘅心情一路都仲未平伏到，腦入面仍然不斷重複又重複咁回憶啲劇情，令我感到最深刻嘅係主角韋莉認識新朋友之後嘅情緒變化。
為咗討好新嘅朋友，韋莉連自己鍾意嘅band都要扮唔鍾意，好朋友行到埋嚟問韋莉睇唔睇隊band嘅表演呀？佢話『隊band老土到咁，邊個會去睇呀～』呢句話係韋莉特登講畀啲新嘅朋友知嘅，因為佢以為咁樣做，新朋友就會覺得彼此係『同類人』。
之後韋莉學佢哋染紅髮，企圖令自己覺得融入咗佢哋，甚至聽到自己唔明嘅笑話都要強顏大笑，結果尷尬嘅係佢自己，到後面韋莉連對好朋友嘅承諾都放棄埋，選擇喺比賽同自己最好嘅朋友打對台。
原來最重要是做返自己
呢啲故意討好嘅行為我曾經都做過，甚至到依家都仲偶然會做。嗰陣明明我覺得朋友講嘅嘢係錯嘅，但為咗合群唔想尷尬，我都表示同意。我最初都以為只要我去改變自己，我就會成為佢哋嘅『好朋友』，但其實咁樣反而一啲幫助都冇，到最後連自己都冇埋。
最後我有鼓起勇氣，講返自己嘅睇法，然後嗰群人入面就開始有人同意我嘅講法，依家仲同我成為咗best friend！
另一part令我大喊嘅係阿樂講嘅一句話：『可能青春期就係會少咗快樂……』
年輕人心聲：青春期就係會少咗快樂？
佢一講完我就即刻喊，因為自從青春期，確實快樂係會少咗。平時對住朋友家人先會開心，對其他人好似有隔膜咁，會質疑對方究竟係咪好人呀？抱著疑問嘅心態同其他人相處。
好多時焦慮呢個情緒佔大比數，會覺得自己做得唔夠好，不停過分擔心，不停踩低自己，會畀勁多壓力自己，呢啲情緒應該所有青春期嘅人都覺得好煩，所以睇緊套戲嘅時候我唔鍾意『阿焦』。因為佢嘅過分擔心，令韋莉原本嘅自我慢慢消失，佢以為只要融入到其他人，韋莉就會無事，但其實唔係。韋莉係一個特別嘅獨立個體，佢有自己嘅思想，唔應該有任何情緒去控制佢，結局係阿樂叫阿焦放手，畀韋莉自己去選擇，結果有一度黃色光牽引去到阿樂身上，嗰一刻我就明白其實韋莉心入面一直都想快樂，做自己就可以了，其他人點諗都無所謂，愛自己愛家人愛朋友。」
為你的孩子築起最堅固的家庭島
感謝小柔花時間寫篇短文，小柔佢今年已經14歲，喺我眼中，佢同屋企人嘅關係仍然好好，而呢個所謂嘅好好，係指佢同媽咪爸爸有時都會「針鋒相對」，串下對方，但係呢啲生活日常，完全唔會影響到佢哋打從心底對家人嘅愛。佢仲話自己個家庭島應該同朋友島差唔多大，媽媽應該會表示很欣慰。
呢位小妮子最後寄語青春期孩子嘅父母：「其實青春期嘅仔女已經盡晒全力去接納你哋嘅意見，儘管我哋經常有好多壓力，但係只要互相包容，彼此一定會快樂。」
其實睇到小柔篇文章，各位編輯都不約而同覺得「好Raw」，提醒咗我哋原來青少年人就係咁，情緒可以好似成人咁複雜如絮，又可以保有孩童嘅直觀同單純。喺呢個孩子變成人嘅關卡入面，真係好需要有一啲嘅引導，需要有家人好好嘅Back up。如果你屋企都有位少年人，不妨都問下佢心底嘅感受，打開耳朵，互相傾聽。
圖片來源：Pixar
