「嗚……嗚……」一聲聲的嗚咽由阿女的房間傳出。
走進阿女房間，看見她張開眼睛，在床上滾來滾去，眼裡透露出惶恐不安的眼神。
「唔使驚，發噩夢啫，繼續訓啦！」隔了一會， 阿女像是安靜了，抱頭進睡。我也沒有將它放在心中，繼續煲劇。
過了幾天的一個晚上，我與隊友正在客廳看電影，突然一聲尖叫，嚇得我倆彈起，連跑帶跳咁走去阿女房……
一入到房，發生咩事？做咩阿女企咗起身？面容扭曲地看著我們。「好驚呀！好驚呀！唔好呀！唔好呀！」阿女邊說邊「fing手fing腳」。
此時此刻，作為娘親，第一時間當然衝過去想攬實以作安撫，殊不知，我愈抱她，她愈掙扎，好似唔識我咁。
阿女這個舉動，令我有點措手不及之餘，內心更泛起了一些怪念頭……
一時之間腦袋又出現千百個可能性，會唔會發夢呢？會唔會唔舒服呢？又會唔會係啲……「污糟嘢」？
正當媽媽的內心戲愈演愈烈時，一直站在我和阿女身後的隊友，做了個簡直嚇得我腳仔都軟的舉動——他突然大吼一聲：「唔好攪咁多嘢，嚇親啲細路仔！爸爸喺度！」
阿女又安靜了，又再抱頭睡去。
我轉頭問隊友：「怪談呀而家？我耳膜就穿喇。」大家忍不住相視而笑，然後他說：「我都唔知點解會衝口而出，被阿女嚇到語無倫次。」
如是者，阿女斷斷續續都會咁樣情況，而我亦開始紀錄一下她發作的時間以及症狀。之後與醫生老闆閒談中提及阿女的情況，醫生聽罷大笑不止：「其實呢⋯⋯」
讀者們， 讓我們歡迎「夜驚」出場！
原來，夜驚，又稱”night terror”，是兒童常見的睡眠問題，主要是因為他們大腦發育尚未成熟。如果小朋友平時唔夠瞓，或者睡前玩得太癲，夜晚瞓覺就會容易出狀況。發作時，一般都很難叫醒他們，發作過後亦不會有所記憶，就像夢遊。
回家後，問阿女：「之前你有無發過好恐怖的噩夢呀？」
阿女摸不著邊：「無呀！不過我發咗一個夢好開心……（下刪一百萬字）」
而我亦向隊友闡述醫生老闆的話，隊友鬆了口氣：「呢個故事，起碼被你笑足廿年。」
我大吼一聲：「唔好攪咁多嘢，瞓覺！」
各位讀者，以上有關夜驚的資料未必是最詳盡說明，若有疑問，可請教家庭醫生。
圖片來源：pixabay
