「舒適圈，就係要跳出去㗎啦！」呢句說話，大家應該聽過無數次，又或者自己都講過唔少次。
我曾經都對我個女都講過好多次。
內向女兒的小司儀訓練班
佢細細個開始就比較怕醜內向，講嘢細細聲，見到陌生人仲會躲喺我哋後面。我一直有啲擔心：咁落去唔得喎！依家個社會，表達能力好緊要，開朗啲、外向啲，總會行得順啲掛？於是，喺佢7歲左右，我幫佢報咗個小司儀訓練班，唔係要佢做小明星，但至少希望佢會學習到勇敢企喺人面前講嘢，多返啲自信心。
結果，相信大家多少都估得到，但我仍想寫低到底發生過什麼事——
當突破舒適圈成了一種折磨
啱啱開始時，我知佢會需要更多父母嘅支持，所以好用心陪伴。我會陪佢練習，糾正發音、教佢點樣企、眼神交流、手勢應該點用，仲會同佢一齊上堂，但每次都會見到佢都好唔自在，聲音細到好似蚊叫，眼神飄下飄下，雙手扭埋一舊，成個人都不在狀態。其他小朋友舉手發言、積極參與，佢就縮埋一邊，輪到佢講嘢，連老師湊近都聽唔清楚。
後尾，佢試過未去上堂就開始肚痛。「唔緊要嘅，適應下就會好！」我當時仍然心諗，呢個係過程嚟，跳出舒適圈梗係會唔舒服㗎啦！我陪住佢就得。
直到嗰一期完咗，佢終於鼓起勇氣同我講：「爸爸，我真係唔想再去啦……每次上堂都好唔自在。」
嗰一刻，我醒悟到呢個所謂嘅「突破舒適圈」，對佢嚟講根本唔係訓練，而係折磨。（我認我係後知後覺嘅）
人人都話跳出舒適圈係好事，但如果方向錯咗呢？世上真係唔係人人都適合企上舞台。有啲小朋友天生鍾意表演，有啲就鍾意靜靜哋做自己擅長嘅嘢。如果小朋友本身就唔鍾意喺大庭廣眾面前講嘢，硬推佢做小司儀，真係會令佢變勇敢？定只會令佢更加驚，更加抗拒開口？
放對地方，就會發光
我開始轉變諗法，唔再要佢「變外向」，反而冷靜落嚟觀察——到底佢鍾意咩？
其實佢由細個開始就好鍾意寫故事！佢嘅故事細膩有創意，寫得生動有趣。我於是改變策略，鼓勵佢參加故事創作活動，仲同佢商量，喺屋企搞咗個「小故事分享會」，只邀請幾個佢熟悉嘅親友，等佢用自己舒服嘅方式去分享。
呢一次，佢依然有啲害羞，但至少願意開口講自己嘅故事。
自始我開始對「跳出舒適圈」有咗新嘅睇法，我唔反對新嘗試，但跳出去都要搵個啱嘅地方落地。海豚游水好叻，但如果逼佢參加跑步比賽，佢根本連腳都無，點跑？花豹跑得快，但放佢入游泳池，佢識游都一定唔會游得比海豚好。與其花心思把小朋友變成「我哋想像中」成功嘅樣，倒不如陪佢一齊搵到適合自己發光嘅地方。
圖片來源：AI圖片、Pexels
