#110 雯雯 （仔，3歲）
「我係一個『大女人』，凡事都好有主見，唔會輕易認輸同低頭，可能就係因為咁，我先可以喺職場上平步青雲。只不過，倔強如我，走進複雜無比嘅婚姻關係，就變得舉步為艱——尤其是我老公都係個『大男人』。
兩個自我嘅人撞埋一齊結果會係點？咪就係喺新婚第二晚，我哋兩公婆已經嘈交嘈到要報警。本來應該幸福滿瀉嘅新婚生活，變成充斥著吵罵聲的修羅場，嗰段日子我無時無刻覺得自己嫁錯老公。
離家出走，我試過；離婚，我認真考慮過。點知當我喺婚姻嘅大門口徘徊之時，我．有．咗！
唔知係咪因為大肚荷爾蒙影響，又或者我太想解決問題，大家嘅關係開始有微妙嘅轉變。
記得嗰陣我大住個肚，喺屋企廁所抬頭發現，牆上有好多潮濕天會出現嘅『小飛飛』。數量多到令人不安，但當時腹大便便，唔方便擒高，唯有向老公求救，佢即時拍心口應承幫手搞掂。點知！我之後再入去廁所，發現啲『小飛飛』依然非常壯觀。
到底佢有無聽到我嘅求救？大住個肚點搞呀？雖然仍然無助，但嗰刻我只係向房入面嘅老公傳話：『老公呀～你幫我整咗啲小飛飛未呀？』『……嗯，搞掂咗啦』佢答道。既然佢話搞掂咗，我就順住佢意思，語帶感激咁講咗句：『係呀？唔該晒呀老公。』
離家出走，我試過；離婚，我認真考慮過。但今天，我慶幸自己留下來了。
之後，我發現佢轉個頭扮去廁所，才靜靜雞完成『任務』。
就咁諗返，雖然仿佛係『小事』一則，但呢件事可以話係我嘅新發現，原來夫妻相處可以係咁。從此我相信，與其互相指責，不如多啲忍讓；暫時放下自己，關係為先。打個譬喻，如果老公應承左但又無去倒垃圾，唔需要急著勞氣，俾說話佢聽『做乜你又無倒垃圾』；反而喺佢有做嗰一日，讚下佢有幾貼心，因為鼓勵先會帶來動力。
學會欣賞一點都不容易，也不是次次都能夠做到。但至少，我真切感受到努力學習欣賞所帶來的改變。
最近一次同老公一齊返教會，牧師讀咗一段好長好長嘅經文，之後我哋各自分享自己嘅領悟同感受。到老公發言時，佢話對經文講及家庭嘅部分印象最深刻。對其他人來講，似乎無咩特別，甚至可能會覺得佢係咪唔專心先聽唔到其他野咋，但當下坐在隔離嘅我，望住佢，默默聆聽著——雖然佢無直接講出口，但我知道，佢有幾重視我哋嘅家庭。」
圖片來源：Unsplash
